前排，接到個朋友電話☎️友：「喂！我下個月成家移民啦✈️。」我：「吓⁉️👀咁突然！🥶」下刪幾百字嘅對話。。。友：「嗱！預咗你請我食飯😎，我揀咗去邊度食㗎啦。。。到時見！」我朋友係一位念舊精🤪，臨別依依，唔係要「屈」我去D咩高級餐廳，只係選擇咗一間邁向50年歷史嘅老字號👇。 德輔道西360號 永合成馳名煲仔飯我朋友喺上環長大，而呢間店嘅前身就喺上環，係佢屋企以前嘅飯堂，不過，我朋友結婚之後，搬咗去新界，好耐無返過嚟。嗰日11點鬆D嚟到，我就食住花生🥜，睇住我朋友同舖頭兩位阿姐相認🤣，畫面係溫馨嘅，似屋企人，多過似顧客❤️。 間店好細，得幾張枱，裝修懷舊，但乾淨企理，目測好多都係熟客，同舖頭兩姊妹有講有笑。 牆上面掛咗一幅字畫，內容大致係廣州「大同酒家」好出名嘅對聯，原文應該係咁👇～「大包易賣，大錢難撈，針鼻削鐵，只是微中取利；同父來少，同子來多，簷前滴水，何曾見過倒流。」唉！呢副對聯寫盡世情❤️。 呢間店最出名嘅梗係煲仔飯啦👍，即叫即做，通常要等20分鐘以上。炮製煲仔飯嘅方法特別，師傅揀老米加入接近攝氏100度嘅熱水，首先喺明火爐煲2到3分鐘，再放入180度高溫嘅麵包爐焗👇 招牌窩蛋牛肉煲仔飯 ($78)👆一人一煲，以為份量好大？No❗️個沙煲比較精緻，個size啱啱好。先講牛肉，係手剁牛肉，醃得入味，質感鬆軟又帶D咬勁，加埋個窩蛋，有肉香，又有蛋香； 至於個飯，由於火候平均，飯粒分明，而窩蛋再加添整體順滑嘅口感。食之前，阿姐提醒我哋，唔駛落咁多鼓油，基本上，我唔加鼓油，已經好好味😋。我朋友點咗個飯焦版本👇 $78加$10👆師傅將麵包爐「出爐」嘅煲仔飯再用明爐大火煮1到2分鐘，飯焦就係咁煉成💪😎。飯焦香脆，唔會過硬，再豐富咗成煲飯嘅texture同香味。另一個重點係「例湯」，所謂「例」，一D都唔hea，真材實料👍，無加味精❌。每日例湯款式都唔同，嗰日我哋獲得嘅係牛蒡龍脷葉湯👇 例湯 (大$25、中$20、小$10）阿姐叫我哋飲多D，清熱潤肺，專治喉嚨乾痛👻。呢個下晝，唔止我朋友，連我都覺得我哋好似喺屋企食緊飯😅，彷彿係屋企老媽用最老實嘅材料，唔加味精，以一噸愛心去做嘅一餐飯，賣相唔駛花巧，只係真實咁呈現食物嘅原味。其實，食物都係其次，成餐飯伴隨嘅係好多笑聲、朋友嘅回憶、對家嘅掛念🥰。係呀！有一種味道叫人情味，係「家嘅味道」❤️。https://www.facebook.com/pages/%E6%B0%B8%E5%90%88%E6%88%90%E9%A6%B3%E5%90%8D%E7%85%B2%E4%BB%94%E9%A3%AF/169899006683250（完）
