何文田港鐵站B1出口去紅磡蕪湖街方向，一落咗天橋，望向對面馬路👀你會發現一間簡約裝修，以水泥牆同木做門面嘅舖頭，店名叫「揉然地」，真係估佢唔到🧐原來係賣麵包🍞🤣 紅磡蕪湖街55號 「揉然地」👆呢條街真係唔算旺😓民居唔集中，D舖頭又「雜崩冷」，車房、麻雀館、食店乜都有D🧐，好彩間麵包店對出有個巴士站同近何文田港鐵站，否則，條街鬼影都唔多隻👽。 好奇心之下，我走入去八吓😜店舖唔大，裝修以紅磚仔同水泥嘅質感為主，配上柔和嘅燈光，滲出一份屋企嘅溫馨🏠。佢哋嘅包裝袋上面印咗呢句～ 「揉然，知味，用心打造每一口舒閒之味。」嘩！空氣一樣咁虛無縹緲喔☁️呢D咁嘅宣傳句語，梗係有咁大吹咁大🤪最後，咪得個講字！但係，當我食過佢哋嘅麵包之後😳Sorry‼️我真心appreciate呢間舖嘅質素同用心❤️，甚至令我明白果句宣傳句語唔係老吹㗎🤣。 芋泥卷蛋 ($158)👆雖然卷蛋嘅價錢唔算好平，但食完，我完全覺得物有所值👍。有別於一般嘅卷蛋，「核心嘅外圍」係一層有芋頭粒嘅芋泥，刻意有D粗糙，口感幾實在，跟住，鬆軟嘅蛋糕包住另一層芋泥，呢一層「核心嘅內圍🤣」嘅texture係有D唔同，似幼滑嘅cream，又有清香嘅芋頭味，然後，卷蛋嘅「核心」好驚喜咁添加咗麻糬，非常煙韌，所以，嚴格嚟講，成件蛋糕有四個層次，好豐富，而且，好飽肚🤣。一般嘅卷蛋好多cream，食落幾「漏」，而呢一款仲要係芋頭添，點會唔「滯」吖！？就係咁神奇！「揉然地」嘅卷蛋確實無帶比我「膩」嘅感覺，師傅將個甜度控制到「天然」嘅甜，而豐富嘅texture令你覺得件卷蛋幾特別同好有趣，你會不自覺咁食吓一啖、食吓又另一啖，食食吓，完全無罪惡嘅感覺🤪。 「揉然地」嘅法式布丁麵包($22)👆未講「揉然地」嘅Crème Brûlée Bun之前，首先要講講「嘉多娜餅屋」嘅名物「法式布丁麵包」，最近，我中六合彩一樣，竟然趁出爐嘅時間，買到佢👇🤣 「嘉多娜」嘅法式布丁包👆呢個名物以法包脆身、蛋心滑溜、蛋香十足見稱，而且，價錢只係$15，抵到爛！👍而「揉然地」嘅版本幾聰明，唔正面對撼，走「雪凍食」嘅路線😎。所以，中間嘅蛋心相對比較結實，但蛋香無走樣，特別喜歡麵包嘅texture，即使雪凍咗，仍然好軟熟，唔會死死實實。如果你點都買唔到嘉多利名物嘅話，不妨可以試吓呢款囉😊 「揉然地」賣嘅麵包萬七咁多種（其實，我覺得太多，應該要focus D，否則，生意唔易做😳），我真係無可能短時間內試晒咁多隻，已經好努力食唔同嘅款式🤪得出嘅結論係～佢哋嘅麵包有幾個特點：1）唔油‼️其中嘅代表作係牛角包 ($16)👇 某D麵包舖嘅牛角包真係嚇死你😬摸上手已經肥淋淋到阿媽都唔認得，「揉然地」嘅乾身得嚟，好鬆化，而且，結構好靚。2）唔重口味‼️唔會刻意加重牛油味、芝士味、芝麻味…，唔會過甜、唔會過鹹，推介日本芝麻牛奶骰仔 ($22)👇 3）口感豐富‼️喜歡結合唔同質感嘅食材，非常玩嘢😎好似以下呢一款真係痴孖筋，😜個名已經宇宙級咁長～宇治抹茶紅豆麻糬海苔肉鬆吐司（點呀⁉️乜鬼名呀🤣）($24半條）👇 食呢個包👆真係好忙🤣一時又肉鬆、一時又紅豆、間唔中又有麻糬，個味道又帶少少綠茶嘅甘香，睇得出用咗唔少心思去設計個組合。要做到以上1、2、3呢幾點嘅同時，又無犧牲到麵包嘅質素，好明顯係師傅嘅功力。唔好以為我收咗錢，或者免費食咗佢哋D麵包，所以，幫手賣廣告喔😎（D麵包係我真金白銀買㗎🤣）。我食「揉然地」嘅麵包🧐有一種獨有嘅感受，四個字—「我無負擔‼️」呢種「無負擔」某程度係因為「唔賣弄」，唔會因為商業元素，就要賣弄造型、加重味道、增加口感，反而只係好單純咁呈現麵包同甜品嘅真實味道同質感😎。我相信係多得師傅製作嘅初心同用心，單喺用料方面，麵粉係嚟自日本同法國，而且堅持唔用添加劑，整出嚟嘅麵包就會健康好多。隨即令我諗返起佢哋個句懶有型嘅slogan🤣「…用心打造每一口舒閒之味」，無錯‼️就係呢種感覺‼️食佢哋嘅出品，好自在！好閒適！😎。https://instagram.com/leisurely_bakery?utm_medium=copy_link呢D小店，大家有機會就幫襯啦💪。世界難撈呀！（完）
