機緣巧合，決定去大阪快閃4日。大阪成日都閃，包生唔使睇地圖，都識帶路，循例都想望下上次行程，睇下今次想去邊。開番自己個blog search，先發現自己上次3月尾去個轉冇寫到！晴天霹靂⋯⋯我連自己冇寫都唔記得！所以遲咗好多，但都想記錄番，有機會睇番開心下～（其實仲有對前年10月去左東京成個星期，有機會又再補番） 早機出發，7:00am係機場AE lounge食早餐 點擊圖片放大 +3 2歲半嘅包囡，絕對唔易對付！佢勁眼瞓都好，上飛機咁新鮮，點可能瞓！上到飛機唯有用電視放題令佢靜少少，平日係屋企冇電視睇，係機上幾個鐘就放過佢啦！不過sorry ，怪獸包囡而家大個左，好硬頸又臭脾氣，基本上完全唔講道理，千祈唔好以為有電視，佢就會靜靜坐係到！佢又扭呢，又扭唔路，又話睇呢個，睇睇下又話唔睇呢樣，要睇另一樣⋯⋯飛機上得4集Peppa pig, 睇到厭又扭，要睇巧虎，睇一陣巧虎又唔啱心水，又話要睇番peppa pig，係機上呢幾個鐘，就係咁loop住扭。終於到攰瞓著嘅時候，就係落飛機個陣，好悲哀⋯⋯ 幫包囡叫左個child meal，不過包囡對佢興趣不大，淨係食左個朱古力蛋糕。基本上child meal嘅早餐，同正常嘅早餐分別不大，係多左包果汁同蛋糕。 張相影唔到個蛋糕同果汁 望番上次3月果次包囡個Child meal，好似上次吸引啲。 到機場後，係出面買左兩份麵包+咖啡，再去買巴士車飛（買埋回程，平少少）。 我地搭5號站架巴士，巴士主要去梅田一帶。 車程要一個鐘多少少，係巴士上可以慢慢食lunch，係飛機食到時間亂晒，通常都冇乜胃口，包囡食左少少包，少少餅同飲左包奶，正當食飽又有啲睡意，巴士就到埗要落車。我地係終點站herbis落車，再經地下街行去酒店Hilton Osaka。 包生book左最普通嘅柴房，因為有AE嘅關係，upgrade左去Executive room，可以去executive lounge。 點擊圖片放大 +3 上房放低行李後，再落3樓lounge食tea！正！ 包囡都行到熟路⋯ Tea time主要係輕食，有迷你甜品、蛋糕、三文治、曲奇、生果等等，另外仲有果汁同熱飲⋯ 點擊圖片放大 +3 Hea 左一陣，我地就出發去Grand Front Osaka，由地下街行去大阪站，10分鐘左右，再去商場嘅北座3樓BorneLund，包囡可以放電啦！ 點擊圖片放大 +6 玩左兩個幾鐘¥2xxx，幾抵！包囡玩到攰，係BB車瞓左陣，夜晚係大丸上層嘅餐廳搵食，食飽就番去瞓 今日咁早起身，大家都攰啦！
