上晝schedule 9:20飛北海道嘅魚翅，delay 左差唔多一個鐘先出發，但又準時到達喎！咁點解唔直頭10:00先出發？俾我地訓多陣嘛！ PE位只係座椅較闊，食嘅野、行李等都同Econ一樣。都好嘅，包生需要多啲空間鬆下對腳！出發前一直好擔心包囡會係機上發癲，因為上次回程程機真係好惡頂！我地帶左顏色筆，LEGO同絕招：幾集「巧虎」係手！ 介紹下「巧虎」～係套小朋友教材，按小朋友年紀（1-6歲），有唔同系列嘅教材，每個月會有一本故事書、一份玩具同一隻DVD，以一隻名為「巧虎」嘅老虎做主角，介紹唔同嘅主題，例如：洗手、擦牙、跌倒會自己企起身、去座廁寶寶wee wee等等，故事書會有貼紙/圖卡玩，DVD有好多歌仔唱下跳下，包囡睇到中哂毒！ 巧虎Website(香港版)： http://www.parenting-times.com/enquiry/contact-us.php 我個人好反對電子奶嘴，但坐飛機咁多個鐘，而且怕影響到其他人，真係要帶定個奶嘴係身！有得揀，我都唔想出呢招，因為唔想包囡知道電話都睇到巧虎！ 上到飛機，包囡好乖咁玩自己嘅玩具，玩到厭啦，爸爸開左飛機電視嘅Peppa Pig畀包囡睇。神奇嘅事發生左啦～包囡識得睇卡通片！佢睇得明個故事，仲話畀我地知Peppa去游水！上次大鬧飛機係4月嘅事，只係過左2個月，包囡學識睇卡通！犀利！睇左一陣，包囡眼瞓，卡通都唔要，自動走過黎摟住我瞓！咁啱有Crew黎畀兒童餐我地，瞓左，食唔到喎！機艙服務員話個餐只能夠keep一個鐘，過左就唔食得啦！結果包囡瞓左兩個鐘，包生同我可以好寧靜咁食飛機早餐。到包囡醒左，kids meal已經唔食得啦，機艙服務員畀左份大人早餐包囡(main course係大人餐，其他配套都係跟kids meal)~ 有野食唔使餓親，包囡就會乖乖。食完早餐，睇多陣電視，就去到新千歲機場！非常順利！最終巧虎唔使出場，太好啦！ 出去拎行李，呢到連BB車都會成件放係盤上，係行李帶上轉，等你自行認領！ 咩方式出唔緊要，最重要唔使等太耐！出到去3點幾，個肚有啲空虛，行去domestic果邊食件三文治，飲咖啡同食雪糕。抖左陣再坐JR出札幌，網上寫呢程JR只需37分鐘，快過巴士一半！係唔錯嘅！連埋揀指定席，每位¥1590（包囡未使買飛）。 出到札幌check in完已經6:30，哈哈⋯放假就輕鬆啲啦！我地住係Hotel Gracery，位置非常好，JR札幌站斜對面就係，步行距離5分鐘左右！如果拖行李的話，記得係JR西口出，行地面過，因為地下街有樓梯又上又落。 酒店房間~ 點擊圖片放大 +2 房內係預期嘅細，包生話我住得太多Hilton，住唔慣日本standard size！呢到book房好難搵到double bed，通常都係twin bed，兩公婆都要分床瞓！我地當然冇問題，最重要係包囡可以瞓埋一邊，唔會碌落床！ Check in之後過對面Daimaru行左圈，係supermarket 買左幾個水蜜桃~ 再搵個地方食晚飯，基本上而家對食冇乜大要求，主要睇下餐廳係咪baby friendly，搵唔搵到啱食嘅野畀包囡？坐到又食到就冇問題！ 我地搵左間食蕎麥麵同烏冬嘅店~ (放心，張相係食完先影，冇阻人收工!) 點擊圖片放大 簡簡單單食個烏冬（包囡至愛）就番酒店啦！ 呢到全部食肆都好baby friendly，見你同小朋友一齊，會好主動送上小朋友餐具~
