雖然包生公事繁忙，都不忘換機票去旅行。一早排定六月中淡季去北海道，最後五月尾收到confirmation email，換到3個premium economy位出發。冇錯！係3個位！包囡過左2歲生日，要自己坐一個位啦！換機票嘅里數同大人一樣，每人18000里，來回36000，比起Econ來回合共20000里，真係多一截，不過PE位闊啲，飛北海道機程咁長，包生話要坐得舒服！包囡機票同大人機票嘅唯一分別，就係畀少啲機場稅⋯⋯ 包囡而家2歲2個月多，識表達基本野，凍唔凍、餓唔餓、食唔食、好唔好、你想點等等都有問有答，心情好嘅時候會又唱又跳，玩玩具會自言自語，同啲公仔傾偈，餵下佢地食野，會叫公仔小心食物熱，好得意！真係不經不覺大個左好多～所以今次去旅行，都安排左啲景點畀包囡，有如放狗一樣，儘量每日安排放電位畀包囡跑下跳下，出身汗精神抖擻唔扭計！ 如果去北海道係純為賞花，咁就真係千祈唔好揀六月！六月嘅北海道，未開花，冇景睇，其實麻麻地吸引。 六月嘅富田~ 好唏噓 七月嘅富田~唔識影相都會影得好靚 真係差好遠!! 早幾年包囡未出世之前，我地已經去過睇花睇樹，去過大部分最common嘅旅遊景點！今次帶住包囡，主打陪玩，做對廿四孝父母！ 行李方面，當然都好唔同～ 衣物類 北海道天氣：11-25度，溫差大，又要薄又要厚 小小提示：日本室內通常都好熱好焗！！記住著啲薄衫係底，出戶外先加番厚衫厚外套！ 1。底衫（有長袖，有背心） 2。面衫 + 後備衫 3。長褲 + 後備褲 4。厚外套 5。薄外套 x 2（一件保溫類，一件風褸） 6。薄被仔（係飛機同BB車上瞓覺用） 7。睡衣 8。襪 9。出街鞋（著住去） 10。潛水鞋 x 1（室內著冇咁易甩，不過下次都係帶番拖鞋同睇開啲啦） 11。紗巾（抹咀、抹面、抹汗、抹手、沖涼⋯⋯） 12。沖涼大毛巾 13。睡袋 14。陪瞓公仔（包囡最鍾意巧虎） 食物類 1。零食：餅仔、提子乾、果蓉、果汁（個人推介：粒粒饅頭仔或提子乾，飛機升降或遇到氣流，畀啲粒粒食物包囡食，等佢吞多啲口水會冇咁辛苦！） 2。奶粉 & 奶粉羹 3。奶樽 4。BB水壺 5。保暖 / 普通水壺 （載後備水用） 6。食具: 碗、餐具 x 2 套（早餐用酒店餐具，帶2套ok）、口水肩 x 3、剪刀 x 2、餐枱墊 7。毛巾盒 8。密實袋（一兩個備用） 9。保鮮袋（一兩個備用） 10。熱水煲（包生買左German Pool個旅行煲，可以摺埋，電壓全球通用，細細個，唔錯！缺點係：電壓始終差啲，係日本煲嘅時間會長啲） 清潔用品 1。尿片（每日約6條） 2。濕紙巾 3。凡士林 + 棉花棒 4。換片墊 5。pat pat藥膏 其他清潔用品 1。小朋友洗頭水 + 沐浴露 2。沖涼玩具 3。沖涼膠地墊 4。Body Lotion 5。牙膏 + 牙刷 + 漱口杯仔 6。洗奶瓶液 7。洗奶瓶刷 + 清潔布 衛生用品 1。指甲鉗 2。後備藥，口罩，退熱貼 3。泡泡搓手清潔液 4。滴露 (抹酒店廁板，浴缸用) 5。衣架 x 3 + 衣夾幾隻 戶外用品 1。BB車 2。玩具 3。帽 / 太陽眼鏡 4。BB防曬 （包囡大個啦，唔肯坐揹帶，亦唔需要BB座椅帶。） 包囡而家早晚飲約150-180ml奶做supplement，平日三餐可以跟大人一樣，食物要剪細啲，當然生野、難咬碎、難消化嘅食物都唔可以。去旅行冇辦法啦，要睇開啲，揀啲有質素嘅食肆！真係好有要求嘅，可以帶飯煲去煮，不過我地放棄左啦！包囡開心，我地又輕鬆，幾好呀！
