上次搭早機，包囡瞓足全程，但今次⋯⋯唔使諗！ 朝早5:30出發，包囡醒左，好眼瞓但又唔肯瞓。 到機場check in，諗住用揹帶揹住包囡係身佢會瞓，所以將BB車都寄堆艙，點知⋯⋯一直都冇瞓。 包生同我入plaza premium lounge好逼好趕咁食早餐，兩位長老就去CX business lounge慢慢歎。 約好時間閘口等，再一齊上機～ 我地換左機尾嘅bulk head seat，坐低冇耐飛機都未起飛，包囡終於摟住我瞓著左，我地可以休息一陣。 可惜瞓左1個鐘多啲，腳痹加派餐，包囡醒左。 嗚~唯有一齊再食早餐。 我地預備左啲方包同雞蛋畀包囡上飛機食。 食飽飽之後，包囡就好雀躍咁周圍搵野玩，唔肯玩自己啲玩具！ 我開左啲卡通片畀包囡睇，可能佢未識睇，對卡通片完全冇興趣！ 我地前面正正係空中服務員工作地方，包囡係咁行去揭開個簾，搞住啲姐姐。 佢地真係好專業，完全冇黑面，仲想請包囡食零食。 包囡太細未食得，我婉拒左。 於是佢地送左幾盒蒸餾水畀包囡（飛機餐個隻）。 包囡好開心咁拎住盒水搖，可以消磨到一陣。 後半段嘅時間，就係不斷重複咁行去搵姐姐玩，同被我捉佢坐番埋位⋯ 到飛機準備降落，我地一定要番位坐，包囡開始躁底，扭黎扭去想落地，仲叫左幾聲。 最後知道冇得走，嬲豬地瞓著左。 包囡瞓住覺入境，行去拎行李，已經見到架BB車泊左係側邊，仲早過啲行李出！ 拎齊野，行去搭巴士出梅田。 諗住包囡瞓左，我地仲有一個鐘車程抖抖⋯⋯ 少年，你太年輕啦！ 我地一出機場，包囡就醒左！ 坐巴士要捱一個鐘先到，唯有拎啲麵包、餅乾同水果蓉出黎頂住先～ 有得食，包囡一定合作，係食完之後⋯就難講啦。 好彩包囡心情好，好乖咁睇街街。 到差唔多要落車，包囡先瞓著。陰公，又冇得瞓！ 我地今次都係住Hilton，所以係尾站大阪Herbis落車。 一落車向後望，竟然見到lift（我地上次搵左好耐都搵唔到，結果要搬幾級樓梯）！！！ 即刻衝入去，落到去都係同一個地下街。 如果由Hilton向Herbis方向行，會先經過Herbis正門入口，記得唔好行入正門，要繼續係坐下街向前行，係下一個出口就會見到直上巴士站嘅lift！ 拖住行李，有lift搭真係好緊要！！ 我地book左兩間King Deluxe，之後send email問過下有冇得upgrade，好可惜最後都安排唔到。冇得去Lounge 食tea 同Happy hour！ 兩間房係正隔離，房間size、格局同上次個間一模一樣。 唯一唔同就係兩間房中間多左隻門可以打通，我地同兩位長老作息時間咁唔同，都係唔好打擾大家啦！ Amex 做緊個promotion，呢次旅程兩間房我地分開做左兩個booking，退番足足$2800俾我地！ 唔知係咪因為咁唔upgrade我地啦⋯哈哈哈哈⋯⋯ 其實有早餐送都好足夠家啦~ 日日都出去，邊有機會番酒店嘆Executive Lounge⋯（自我安慰中） Settle好，已經係tea time。 我地行去梅田站附近嘅Osaka Marubiru地下美食街搵食。 帶住兩位長老，真係要識解讀佢地嘅心意。 上次領教過，今次點都學精！ 如果佢地話食咩都冇所謂，千祈唔好信！！！ 睇左好一陣，最後揀食烏冬～ 天氣咁熱，梗係食個凍烏冬！ 看似平凡嘅烏冬舖，有好多選擇，而且食物質素仲好好添！ 啲烏冬好彈牙，好好味！香港真係好難食到呢啲texture！ 兩位長老點左天婦羅湯烏冬同牛肉湯烏冬，冇影相⋯ 長老仲分左啲熱烏冬畀包囡，食得包囡津津有味！ 食飽飽，行去梅田站附近嘅Yodobashi睇電器。（心齋橋先有我至愛嘅Bic Camera） 去到Yodobashi直去家居電器個層搵飯煲。 咩功能唔重要，最緊要細！ 呢到有好多唔同牌子款式嘅大飯煲，但細飯煲就冇乜選擇。 最後揀左呢個：Koizumi Size 細，煮嘅時間短，價錢亦好平，折完之後¥4806。 包生問：$300幾蚊買個飯煲得，食唔食得家？ 聽日煮完出黎咪知囉！ 買完飯煲，落左Yodobashi底層嘅兒童部睇玩具。 呢到都幾大，幾多野睇，有Bic Camera嘅影子。 上次包囡坐係BB車到呆呆下，今次佢掙扎要落地自己睇玩具！包囡長大左啦（亦都煩左）⋯⋯ 兩位長老又發力，買左架麵包超人單車畀包囡。當然，仲有啲玩具畀其他孫⋯⋯ 下一站：大丸底層supermarket買食材，要準備包囡黎緊3日嘅午餐。 長老揀左菠菜、雞肉、南瓜同三文魚，另外亦買左香蕉、水蜜桃、香印提子同番茄仔。 買完餸，時間都夜。 上左大丸頂層美食街搵野食，好想食壽司，但包囡唔食得，唯有揀間以熟食為主嘅餐廳。 叫左兩份燒魚料理，兩份壽喜燒料理。 除左包囡食得好開心，長老們都食得津津有味（可能肚餓）！ 食飽飽番酒店，係Hilton出口間便利店再買左啲啤酒同雪糕做宵夜！ 終於番酒店抖啦～ 點擊圖片放大 飯煲開箱: 點擊圖片放大 13個月嘅包囡vs 17個月嘅包囡 真係好大分別！！！ 上次仲係一舊飯，今次明顯知道自己出左街，去左酒店過夜，唔係屋企。而且周圍有好多野玩，佢對所有野都好有興趣。 夜晚係酒店房走黎走去搞搞陣，拎左張房卡去大門想開門，古靈精怪！ 包太表示：好忙碌！不停捉鴨仔！ 亦都因為咁，今次完全冇時間影相！ 真係好佩服其他寫blog嘅爸爸媽媽！！
