最後一日，食飽飽早餐就出去最後一逛~ 行左去Grand Front Osaka，呢邊都有好多得意野睇。 不過我地時間有限，係Petit Main買左兩條裙仔畀包囡就回程啦。 沿途經過啲商場底，買左啲手信。 另外仲買左個大福~ 呢個外皮係棉花糖texture，好鬆軟，好好味。 我地request 左late check out，3:00pm前走都冇問題。 買好野，番酒店pack行李，我地就出發搵機場巴士。 沿地下街行去Herbis，搭Lift上番地面個層，搵機場巴士站個出口，但係個到有樓梯...好笨，雖然只係四、五級...行地面就過就冇呢個問題。 搭巴士出機場，check in bag drop後，係機場町家小路搵食。 最後食個大阪燒就上機啦~ 包生回程就用尋日買個Montbell背囊，揹住包囡check in。 我地一邊行就一邊諗: 個背囊上唔上到機? 會唔會被要求寄艙? 結果非常順利!! 由於個背囊太吸睛，等緊上機個陣，仲有個地勤哥哥特意走黎畀我地登機先~ 係~ 我地需要時間收起個背囊!! 今次回程，包囡係機玩足2.5個鐘，冇瞓過咁滯!! 坐係BB籃到 (基本上係企，邊扯住個電視機)，係咁撩排隊去廁所嘅乘客! 真係打擾哂~ 番到香港，本身都唔算遲，不過等架BB車真係等左好耐!! 出境都冇問題，下次番香港個程，我一定要推BB車到閘口先寄艙。 情願係閘口等，好過係行李帶到等。 4日3夜話咁快就完啦!! 希望下次去旅行，包囡大啲，我地可以陪包囡玩多啲~
