上次Ad hoc trip完左唔夠2個星期,我地又飛啦!今次得包生同我帶住13個月大嘅包囡飛~係真正嘅自由行!出發前除左準備行裝,亦要畀定心理準備包生:冇長老幫手,包生要幫手照顧包囡!(哈哈⋯我冇implication家) 4月尾大阪天氣唔凍,十幾度到廿幾度。早晚有機會涼少少,所以行李以薄衫為主。一件長袖打底,再預備啲背心或短袖衫著係面,早晚凍就再著長袖外套。另外,我再預備多件大人外套,如果包囡係BB車瞓左就蓋大人外套,唔帶被仔啦! 今次只係帶左4塊好輕巧嘅磁石積木畀包囡備用。根據之前經驗,旅行時要出動自家玩具機會唔多。對包囡黎講,去街街就咩都好新鮮,所有野畀佢拎上手就係玩具,拎住個水樽、濕紙巾已經可以玩一陣,所以唔使帶太多玩具啦。扭計時就睇下大人可以變咩玩具畀包囡玩!當然,玩餐廳嘅餐牌或者人地嘅野就梗係唔好啦! 食方面,我地採取放任政策⋯網上見好多媽媽去旅行時都繼續煮愛心粥仔飯仔畀小朋友食。我地就真係太懶惰啦,打算畀包囡跟我地食日本餐,真係唔啱食先開包裝粥仔。上次包囡完全唔食我地啲自家粥,佢望見我地食嘅嘢,自己又為食要一齊食,所以我地放棄啦,都係4日啫。今次只係準備左包裝粥仔、果蓉、暖壺同餐具。而香港水就準備左2L,畀包囡飲同沖奶用。原則上包囡飲日本水都冇問題,不過帶番自己水好似安心啲! 出發前,長老同我推薦~小朋友廁所座墊,長老另一乖孫試過好用,於是我買左畀包囡試。 對一個幾歲嘅小朋友黎講,呢個座墊係唔錯嘅(撇除唔太環保),但包囡只有一歲,而且又比較活潑,坐係座墊上面唔使1分鐘,個墊已經飛走左,有墊=冇墊⋯等包囡大啲再用啦! 另外,我地準備左塊浴缸墊。 包囡沖涼個陣,難免會坐係浴缸到,舖個墊係浴缸底,感覺衛生啲! 行程方面,基本上係零準備!未有包囡前,我地都去過大阪好幾次,最通常去嘅地方已經去過,今次唔打算去。基本上畀我地出走幾日hea下,睇下野同買野畀包囡,就已經滿足。至於去邊,之前個日先諗啦!佛系旅遊~