今朝終於起到身食到早餐,地方細細,但野食都幾豐富(忙住湊包囡,冇影到相)。 食飽飽就出發,先去博多巴士總站,搵去福岡塔0既巴士。其實指示牌好清晰,不過我地懶得睇,直接問巴士總站個職員,佢用好流利0既英文叫我地去6號門搭306號巴士,仲教我地買左飛先上車(每人¥230)。 點擊圖片放大 +2 車程大概半個鐘,車上面0既顯示好清楚,會提示而家係邊個站,下兩個站係邊到。就到福岡塔站,仲會有多語廣播提示。我地上巴士前已經畀左錢,所以落車就將啲車飛掉落個箱到就可以啦。如果係中途上車,一上車就要係車門兩側部機撕飛,飛上面會寫住上車個站0既編號,對應番車上面個顯示,就會知車費。車費不設找續,如果冇硬幣,司機位旁有架散銀機,可以將¥1000紙幣兌換做硬幣。 去福岡塔先買入場券,原價每位¥800,遊客有八折,而家每位¥640,包囡唔使錢。一轉入面,影左張合照,佢地會送張mini size0既相畀你,大合照就每張¥1100。影完拎個收據,走個陣鍾意的話可以買相。 點擊圖片放大 我地搭lift上到頂,去睇風景。天氣好,所以景觀都好好。 除左睇風景,個塔上面亦有啲得意玩意。地下舖左個立體拉麵,可以畀人企上去影相。落兩層有個戀人聖地,畀戀人上黎扣鎖,仲有啲裝飾畀戀人影相。包囡係上面掃啲鎖掃到好開心!我地就好忙咁幫佢搓泡泡潔手。 點擊圖片放大 福岡塔對開有個近海0既Marizon,個到有啲舖行下,有食肆,可以行出去海邊吹下海風。 本身有諗過行過去逛下,但咁樣望落去好似好靜下⋯我地都係去番啲熱鬧啲0既地方。 呢邊其實比較近outlet Marinoa City,之但係帶唔shopping 0既兩老去outlet好似真係難為佢地,我地都係出番市中心見識下啦! 出左福岡塔大門,就見到對面有個大相機位,畀遊客放個電話落去自拍。位置剛剛好,可以影哂全幢福岡塔,真係好有心思! 我地行去巴士站搵車去天神,呢到啲車去博多會比較多啲,天神就得一架302號巴士(星期六日會多條線到)。巴士站列哂啲巴士資料同時間表,好容易睇得明。 出番天神,帶兩老行下天神地下街。行到攰就入左Solaria stage底個美食街,食碗簡簡單單0既烏冬,4碗麵加埋¥2870,好抵食~ 食飽飽後就帶兩老去Bic Camera,我地去左大啲0既2號館,呢到規模比銀座細。我地就入去買玩具畀包囡,兩老就掃藥妝。我地好少周圍格價,但個人認為呢到都應該算平,見佢地標價唔高,而且有張bic camera coupon,免稅之後仲可以額外多7% off。張coupon可以重用,有效期半年。今次買完野,個sales姐姐畀定下一期0既coupon我地。放心,我地一定會再黎~ 今次行bic camera,最大發現係藥妝部0既洗衣液。牌子同樣係LION,聞落味道亦都一樣,呢到賣緊每支¥216,真係平到喊!應該話:香港個價真係貴得好過份!係香港買1支,等於呢到買2支!忍唔住掃左幾支走~ 日本版 (380g) VS 香港版 (500g) 背面 側面 側面2 夜晚我地行左去IMS商場,上13樓肉匠太平樂食燒肉晚餐。呢到有燒肉放題,¥2000左右食90分鐘。我見周圍都有好多年輕男女食緊放題,不過我地帶住包囡,餵佢食飯都用半個鐘,所以唯有散叫左幾個set。 點擊圖片放大 +2 食完晚餐,舖頭已經收哂。我地搭3個站地下鐵番博多。臨番酒店之前,包老太係博多駅啲手信舖大手買入,聽日中午就出機場,係時候掃貨啦!