之前個晚太夜瞓，朝早真係唔願起身！我地10:15先落去食早餐，不過落到去職員話早餐已經完左。其實check in個陣，職員都有講早餐去到10:00，不過見早餐劵寫去到10:30就落去博一博。職員話食物只係供應到10:00，佢見我地咁陰公冇早餐食，畀左麵包我地拎番房食。 Lobby放左部咖啡機，可以隨時㩒黎飲。有包有啡，夠啦！ 兩位長老一早起左身，佢地話早餐食左兩碗飯，好豐富！聽日睇過係咪真係咁豐富呀！辛苦兩老等左我地咁耐先可以出發～ 今日去小倉，可以搭新幹線或者JR去。我地就揀左搭新幹線，車程只需15分鐘，當然車費就貴啲⋯ 小倉天氣比博多涼，一落車就要幫包囡著多件衫，好彩早有準備！車站內有啲攤賣小食，包生食包包唔夠飽，買左個肉丸飯團試試，幾得意呀！之後我地就向小倉城方向出發～ 點擊圖片放大 我地行大街去小倉城，浴途啲舖都未開哂，條街有啲清靜。 去到小倉城，兩老冇乜意欲入城內參觀。 比起熊本城，呢到規模真係細好多。我地係城外行左一圈，就係八坂神社個邊出番去，兩老話有個孫陪住，行邊都冇所謂！ 出左神社，去對面Riverwalk商場搵飯食。小倉城同商場一巷之隔~ 出面大街冇乜人，原來所有人走哂入商場。目標為本，我地直上餐廳個層，撞正食飯時間，大部分餐廳都要等位，我地揀左間山葯蓉餐廳試下。 包生話啲山葯似鼻涕，我覺得幾好食呀，呢到仲有明太子山葯蓉試，幾健康，幾得意呀！我仲撈左啲原味畀包囡食，佢都食得好開心！ 食完飯行出商場，見到好多人聚係到捉精靈，場面壯觀！原來仲有好多人玩緊呢隻game！ 本來諗住去旦過市場行下，但兩位長老又好似冇興趣，咁就沿住魚町銀天街行番去小倉駅。呢條街旺好多，有少少似行心齋橋0既感覺，不過呢到賣啲野冇咁潮。我地上左車站對面0既Colet商場，係Muji同Loft逛左個圈，之後就搭車回程。 出番博多，繼續行駅上面個商場。行到攰，就上上面搵好野食，今晚帶兩位長老食人形町今半。（係～又係呢間！）星期日晚，繼續好多人，寫名排隊，等左大概半個鐘先有位。我記得以前呢到冇咁多人，尤其係香港人！唔通有旅遊書介紹過？又或者係多左人去福岡，所以邊到都多人？ 我地叫左兩份すき焼きset 同兩份しゃぶしゃぶset，等兩老試試。以前食しゃぶしゃぶ，職員會煮同分埋，不過而家職員煮第一輪後，會叫你自己煮埋其他（上次係新宿都係）。可能真係太多人，兼顧唔哂⋯ 點擊圖片放大 +2 食呢餐牛牛要花比較長時間，職員見包囡有啲扭擰坐唔定，借左本圖書畀包囡玩，本書都幾得意！食飽之後，職員捧左盤玩具出黎，畀包囡揀一份禮物！又食又拎，真係開心！
