12.5個月大0既包囡第二次坐飛機~ 上次我地係閘口先寄BB車,所以等左好耐。今次我地就寄行李個陣將BB車都寄埋,初時都擔心佢會唔會係行李帶到跌出黎⋯不過見磅完重入袋之後,我地要將架車交去另一邊放入個架到,估計佢地會成個架推去寄艙,咁可以放心啲。 好似冇試過入lounge要排隊,星期六真係特別多人!同兩位長老入lounge食完早餐就上飛機啦。今次因爲太遲換機票,所以換唔到bulk head seat,亦換唔到BB籃,上到機就發現:全機都係BB,所以換唔到都好正常!起飛冇耐,就有crew送左BB餐黎,有兩樽蓉同一支果汁,另外仲有一塊尿片同濕紙巾。 我地自備左粥仔,佢啲蓉就留番下次~包囡係飛機上keep住好活躍,兩位長老坐係後面,佢就成日攀去後面,撩爺爺嫲嫲傾偈(只限傾偈),包囡係飛機上完全冇不適! 落機之後,係行李帶側,泊左一排BB車係到等人認領,似乎寄艙都幾好!拎齊野就出發啦~先搭shuttle bus由國際線terminal去國內線terminal,再搭地鐵去博多。福岡機場同博多距離三個站,真係好近。 我地呢三日會住Forza Hakataekihakatakuchi Hotel,對正博多駅,超方便!不過最近酒店0既出口只得樓梯,所以要係博多駅出左,過對面馬路,轉個彎就到啦! 酒店係2017年開張,入面好新淨。酒店冇BB床,所以幫我地加左個床欄。 房入面有好多得意電器用品,除左有按摩器同按腳機外,枱頭仲放左部蒸面機。 最有趣係:枱面放左部iPad,入面有好多game,包括太鼓の達人!正!包生一入房就係咁玩,可惜免費歌有限⋯唔係玩得好多首! Settle好,行下博多駅0既tokyu hands,之後就係商場頂食晚餐。星期六晚好多人,周圍都排哂長龍,我地揀左間條隊短啲0既遊食豚彩 いちにぃさん,叫左4個懶人set ~ 蒸豚肉,有前菜、炸物、菜、豚肉、飯團、麵,同甜品,好似食極都唔完咁,捧住個肚走~ 點擊圖片放大 +4 最鍾意黎日本買衫買鞋,買啲得意野,以前買畀自己,而家就變哂買童裝,做左廿四孝媽媽!呢期鍾意買餐具餐盒,雖然已經有好幾set,不過見到靚又忍唔到手啦⋯⋯ 個餐具盒設計好細心,蓋入面有兩塊膠,放餐具入去就唔會搖黎搖去。 個餐盒一set 3個唔同size,唔用0既時候又可以放埋一齊,好慳位!