上次番香港冇耐，已經心癢癢想再去旅行，換0左機票4月尾去大阪，準備包囡第二次旅程。點知畀包太兩大長老殺個措手不及⋯⋯ 平日包囡都係公公婆婆照顧，兩位長老突然話4月中會同二孫女去新加坡4日，於是我地被迫放假。橫掂都要請假，包生就上網㩒下，點知又畀佢搵到換福岡0既機票（東京大阪就冇啦）。為公平計，今次決定扶老攜幼第二擊，帶包生兩位長老一齊去福岡快閃。 大人每張機票用20,000 avios，再加包囡機票2,000 avios，總數82,000 avios成行～ 包生成日話：「Avios抵過Asia miles！」 上次去福岡係2014年夏天0既事，係福岡玩左9日，遊左個小圈： Day 1: 博多 Day 2: 博多 > 鹿兒島 > 枕崎（為左睇花火大會） Day 3: 鹿兒島 > 桵島 > 宮崎 Day 4: 宮崎 > 熊本 Day 5: 熊本 > 阿蘇 Day 6: 阿蘇 > 湯布院 > 別府 Day 7: 別府 > 博多 Day 8: 博多 Day 9: 博多 > 香港 點擊圖片放大 睇番啲相都覺得開心! 可惜個陣冇寫遊記，好多仔細行程都唔記得哂... 印象中住得好，食得豪，行程精彩...所有野都好，唯獨係揸車時間比較長，辛苦包生! 今次得4日，去唔到遠，都係乖乖留係博多啦～ 包生兩位長老好少出門，平日亦唔會shopping，但係我地又好鐘意shopping喎，所以決定兩個full day上晝去觀光，下晝就行街！ 超簡單行程： Day 1: 博多 Day 2: 小倉 > 博多 Day 3: 福岡塔 > 天神 Day 4: 博多 至於包囡0既行李清單，主要都係跟番上次咁執。 天氣冇咁凍，執番啲薄衫同外套。 上次包囡唔鍾意食燘壺粥仔，餵親都Lur...所以今次放棄啦!!!打算叫啲清淡啲0既野食同佢一齊食~ 另外都帶左包裝粥仔備用。 唔煮粥，唔使帶米，連香港水都帶少好多! 其實包囡上次旅程尾聲已經溝左日本水飲，唔覺有水土不服0既情況，不過我地今次都帶左2.5L香港水備用。 包囡上次超唔鍾意隻沖涼鴨仔，而且佢識企，所以可以同吹氣鴨仔講Bye Bye! 今次抱住去福岡行4日街0既心態出發，希望扶老攜幼第二擊順順利利~
