晨早起身，包囡仲瞓緊，搬佢落BB車繼續瞓。 我地上37樓快閃食個早餐 (37樓個Lounge開06:00，Lobby餐廳開06:30)。 呢到冇Lobby餐廳咁豐富，但都足夠食飽飽。 食完早餐，Check out房間，搬埋行李上機場巴士，包囡先醒。 係巴士飲完支奶，又繼續瞓過。 係酒店07:05上車，08:20去到羽田機場。 最後係機場Lawson掃零食，就Check in啦。 我揹住兩包BB粥仔，兩包果蓉，再加BB水壺出境。 我同職員講左聲有Baby Food，佢地冇特別叫停我，亦冇拎任何野出黎，好順利就出左境啦。 我地尋日已經收到CX用SMS通知，飛機會Delay。 本身schedule 10:25，最後11:25先起飛 (不過番到香港時間同原定時間一樣)。 包囡係飛機上好合作，表現咁好，包生已經籌備緊下一次旅程! 今次去旅行，基本上只係滿足大人0既願望。 包囡人仔細細，相信唔會太有印象，所以我地冇特別為佢設計任何行程。 啲真正0既親子行程，留番包囡識行識跑，我地再慢慢去! 第一次帶包囡外遊，諗住搵兩位長老磅住好啲。 但其實我地計錯數: 期望0既4:1，現實為2:3! 如果大家要扶老攜幼，真係要有周詳計劃~
