金姐好膚淺 學新語言嘅動力 係因為鍾意當地明星 11年前金姐因為鍾意Rain的起心肝學韓文 中學年代日日煲足8、9個鐘頭韓劇 跟住啲主角喺咁唸對白 自學咗4、5年 大學畢業再跑去韓國跟大學語言學校學一年韓文 總算係學有所成 喺職場上可以順順利利咁訪問唔同韓星 大派用場 韓星過後 金姐近年就迷上泰星 拿拿拿... 一講泰星大家第一時間會諗Tony Ja?!!! 唔係呀, 金姐鍾意嘅泰星嘅美貌程度根本可以媲美韓星呀!!!!不過呢樣下次再介紹喇 總知金姐就為咗泰星跑去學泰文 因為有工在身 而家唔可以好似以前學生哥年代咁煲劇自學 初初就報咗3季工聯會嘅泰文課程作為開始 初級班第一堂都有近30人上堂 金姐都嚇咗一跳 估唔到泰文咁有市場 不過上上下就愈來愈少人 去到最後5堂 就只係得返小貓3/ 4 隻 其實喺工聯會上堂 唔好望會學得好精 老師只會教你最基本嘅發音 語法 同時因為要趕課程嘅關係教得好快 你未消化完第一句 已經教到第五六句 作為初學者 好難跟得到 同埋教學內容好悶 平時生活或者旅行上都好難用得到 所以金姐跟工聯會學同時都會買其他書睇下 學多少少生活化啲嘅泰文 再到而家 就自己搵老師私學 比起韓文 泰文真係難10倍 雖然泰文只係得65個輔音元音 比韓文唔算多好多 但泰文嘅組合複合好多 好多字讀音似到爆就唔在講 啲字好似蛇仔咁 而且圈圈向出向入又會唔同咗 另外輔音加元音係一個組合 輔音加輔音又係一個組合 元音加元音又係一個新組合 配來配去 又有音調 唔同嘅輔音加上音調後又會變調 仲有就係泰文嘅句子排序一般都同廣東話差唔多好似「我去食飯」就係「我/ 去/ 食/ 飯」 但「我哥哥, 他媽媽, 紅色」又會變咗「哥哥/ 我, 媽媽/ 他, 色/紅」 一時一樣 總知頭都大埋 數數手指我都學咗泰文成兩年有多 到而家為止睇劇可以理解到30%左右 聽同講都可以 最起碼去泰國旅行/ 見泰星時都可以同對方普通溝通到 寫同讀方面就差好多 進度真係超級慢 始終平時唔會冇拉拉寫或者讀泰文 進度慢都正常既 所以金姐決定主攻咗聽同講先 而睇劇同聽歌就係最好嘅學習方法 始終劇集嘅對話生活化好多 聽多啲都掌握到少少嘅 —————————————————————————- 多謝睇到最尾 金姐仲有更多生活文章喺下面平台,click入去畀個like支持下呀:) FACEBOOK – Borntoplayhard INSTAGRAM – borntoplayhard/ i.m.kimmy ELLE Blog — kimjei SHE Blog— aroundme Beauty Exchange Blog— kimjei