自從身邊朋友什至家人都出現各種病症, 而一向都覺得都幾注意健康既自己, 但都出現各種奇難雜症... 睇西醫, 頭痛醫頭, 腳痛醫腳, 什至做晒檢查都係回答: 我唔確定... 睇中醫, 無止境地調理落去... 飲藥多過飲水... 什麽營養學自然療法, 樣樣佢推介既都話好, 之前又綠茶, 又藜麥又奇亞籽, 似追潮流多啲... 所以, 唯有求人不如求己, 決心拜讀本厚揼揼既自癒力(Spontaneous Healing by Andrew Weil)同埋, 自己救自己. 書裡很詳細介紹自癒系統如何運作, 什至有八週的建議, 幫人如何將自癒系統提升到最健康. 八週讓你恢復健康活力（8 Weeks to Optimum Health）第一週的第一件事, 就係講油, 食唔好既油會令炎症加劇. 咁點先叫好油, 定唔好油? 書裡面有講, 但係一睇到飽和脂肪, 又不飽和, 又單元等名詞... 覺得個腦開始down機... 不過為咗條命, 同身邊朋友家人既命, 我來研究! (等我以我既簡單方法嚟說明) 油 = 脂肪酸; 脂肪酸=人體需要既既其中一種營養; 所以, 油=要食 脂肪酸分三類 : 飽和, 不飽和, 及反式. 飽和 = 不建議多吃 : 在室溫會"瓊"的油. 主要都係動物既油, 豬油雞油, 牛奶做成既牛油. 植物係椰子油及棕櫚油. 一向都係叫人食少啲, 因為對血管唔好, 平時食肉都已經包埋, 所以唔使再額外吸收. 不飽和 = 分兩隻, 有單元, 同多元. 多元不飽和 = 要均衡地吃:最主要係omega-3和omega-6, omega-6容易有, omega-3平常人飲食比較少, 所以要補, 所以坊間先咩都話自己加omega-3, 但食你都唔知佢用咩加上去, 倒不如食新鮮野, omega-3在魚類, 果仁, 豆類, 阿麻籽, 同野草馬齒莧到有. 補充: 跟據資料, omega-6 同 omega-3係會互搶酵素, 而omega-6我哋不缺, 因為而家啲農場都係用縠飼, 動物食唔到野花野草, 而我哋食既菜又係來自超市, 品種又少. 基本上都係有利omega-6吸收. omega-6作用係發炎及凝固. omega-3就相反. 因為吸收唔夠omega-3 咁血管凝固同慢性發炎可以變成好多病... 單元不飽和 = 主要使用:普遍都話呢種油最好, 因為對心血管既影響最少. 一般最容易買到既, 有橄欖油(Andrew Weil推薦), 芥花籽油, 葵花籽油, 芝麻油, 茶籽油; 其次係花生油, 粟米油. 反式 = 來自自然界既含量好少, 來目人類手上做出嚟既就係元兇. 基本上, 市面上人造牛油 、 餅乾、曲奇餅、炸薯條、蛋糕、沙律醬、面包 、咖啡伴侶... 全部都係... 好處係降低生產成本... 壞處係人體基本上唔識處理... 肝臟係代謝唔到... 就咁就塞住咗條血管... 咁即係咩呀 = 請留意營養標籤上寫著的起酥油, 白(乳)油, 棕櫚油, 氫化植物油, 人造牛油 , 馬芝蓮, shortening, hydrogenated vegetable oil, palm oil, Margarine ...全部都係人造既... 如有興趣還可以看看食物安全中心的這個報告 http://www.cfs.gov.hk/tc_chi/programme/programme_rafs/programme_rafs_n_01_05.html Andrew Weil醫生建議, 第一週棄絕所有人做油. 睇果陣覺得, 好合理吖! 但跟住去行吉之島超市特價星期三, 發現, 能夠買既特價食品係=0 ! 因為樣樣都用! 突然覺得心裡發毛... 我一直以來食咗幾多呢... 仲有, 黑豚仔由細到大咁食落去... (仲未計出街食飯同埋冇營養標籤既食品...) 所以... 阿媽唯有更勤力把關...
