去得旅行，總會想試一餐正野。今次到日本的名古屋去旅行，慶祝紙婚一周年紀念，當日晚餐就揀左網上人氣爆登的馬喰一代 (除了名古屋外，係東京、岐阜都有分店架)。 大家可以上網訂位 (但要選定食的Menu)，佢的燒烤套餐有四款，由7,500yen到20,000yen不等，同埋全部都以位計 (兩位起先叫得) 今次我們要左兩位最貴的「天上套餐」，價錢約港幣1,500位(另加Tax)。雖然係有D貴，但呢個價錢係香港，係絶對食唔到呢個質數同呢個份量。我們點了有係名古屋設廠的麒麟啤，邊飲邊等食。 前菜三種拼盤無咩特別，所以都不作解釋。 【入正題】係法包上加上一大舊香軟的芝士，上面再配上薄薄的牛火腿，咸香非常。 極上飛驒牛刺身拼盤！係呀，全部都係生食。Waitress姐姐仲怕我們燒左黎食，温馨提示我們，呢個係sashimi。一共有三款唔同部位/調味的飛驒牛刺身。先食最右個兩塊較淡味道的牛，佢食落的味道有D似火雞(笑)；中間個塊食落的油香味濃少少；到最左邊的搽上麻油加芝麻，味道較濃，建議連埋下面片紫蘇葉一齊享用。 餐廳上菜，次序未必跟足Menu。食完刺身後，職員就將腹肉握壽司送上。正常份量的壽司飯，上面放上一塊半生熟牛肉。肉味都幾香，但不太建議將全粒wasabi放上牛肉，會搶晒牛肉的味。 再來就係極上飛驒牛韃靼牛肉，同樣都係生食，但廚師稍為有燒過牛肉的片先切開。三片牛肉可以點係較水狀的甜醬油。而旁邊的蔬菜稍為灼菜，可以點較「結身」的醬味道有D似加了芝麻的乳豬醬，令到整體提鮮。 食完以上的冷盤，係時候要食燒肉了！呢份極上牛舌，簡直令我對薄牛舌改觀！原來一塊靚牛舌，就算薄薄一片都做到油香及口感豐富的感覺。2分鐘到就可以燒另一面，再燒落去牛舌的油脂已經被迫出黎。我本人都係第一次食咁Juicy的牛舌，也 (係呀，我用Juicy黎形容) 到了最期待的畫面！極上飛驒牛「極級」菲力心拼盤！呢碟A5和牛，淨係睇佢肉上的雪米紋就知佢幾靚！ 職員主動幫忙換網後，我們慢慢每兩塊塊用炭爐燒香牛排。 由於佢係好靚的牛肉，所以不用燒太耐就可以食。牛肉入口時，D油脂泌曬出黎，加上濃厚的肉味，真係我一直以來食過最靚的和牛\(//∇//)\ 食完和牛排都未夠口？個餐仲有餐廳自家製的腸仔。唔知係腸的油脂定係入面的芝士，食的時間，D「肉汁」直爆口腔！ 如果大家同我一樣怕油的話，可以用牛肉拌飯。其實和牛的油香滲埋D飯到，令整個配撘更Match。 餐飯去到甜品都唔輸蝕！柚子雪巴入口即溶，清而不過甜的的柚子味於口中慢慢溶化，為味蕾帶個完美的Ending。 食飽飯，我見仲有一枱香港人仲等緊位。所以⋯⋯如果大家有心黎試，務必Book位！Book位！Book位！ 想知道餐廳的Menu或分店詳情，可以到餐廳的網址查詢 https://bakuroichidai.jp | 品牌合作 | 出席活動 | 產品試用 | Email : bingfooddelivery@gmail.com
