我的工作環境是一間眼科診所，跟很多「打工仔」一樣，工作也算屬於前線，要接觸很多不同的客人。 遇到好的客人，那天心情都會好點；但相反如果當日遇到的都是比較奇怪的客人，真的會很勞氣。而以下五種都稱得上是我個人覺得最討厭的客人。 1) 遲到仲要聲大夾惡 其實診所大大隻字寫住只限預約驗眼，而且遲到超過十五分鐘我地係有選擇權可以唔接，或者只做部份檢查，因為我地D症一個接一個，你遲到會搞到後面都遲左，但我地無理由要準時既人因為你遲到而等架嘛。但一樣有人遲大到仲要係接待處聲大夾惡話「你同我解釋得黎都驗完啦，快D俾我入去啦！」﹑「咁塞車我都唔想架！？」﹑「我帶住個小朋友（或者老人家）你唔係唔體諒我丫嘛?」大佬，遲到你唔想唔通我想？帶住小朋友或者老人家可能所需時間會比較長Ｄ，但你唔係當日先知你要帶黎既係咩人，應該要一早預好Ｄ時間，我們成間診所唔係淨係等你一個架！ 2) 早到又係要投訴 有D客人總係好鍾意早好多黎到診所，例如一個鐘，甚至再多Ｄ，想睇下可唔可以打尖早D有得睇。早到當然無問題，但你唔可以投訴等得耐架喎。如果之後無預約，或者之後病人無到，我們都唔會介意早Ｄ睇左你先。但如果你預約左三點鐘，你早過兩點半個病人黎，我地都要順次序睇架，唔係預約呢個制度要黎做咩？ 3) 識少少，扮代表 明明你係黎拎意見，但又變左好似你俾意見我咁。「我個視角膜呀…」﹑「我明呀，遠視咪即係老花，哎呀，陰公喇，咁細個就老花…」，天呀，我每日都要講好多次，係眼角膜同視網膜。仲有，信我啦，遠視同老花真係唔同架…！其實唔識係正常，但你都要聽下人講野架。 4) 當診所係託兒所 好多家長帶個小朋友黎驗眼之後，然後就十問九唔應，自己係到玩電話。再離譜D既就帶左小朋友黎之後就唔見左，話請唔到假要返去返工，一陣再返黎先接走個小朋友。家長們，到底你地知唔知你地做緊D咩？個個係你地既仔女黎架，唔係我小朋友呀，可唔可以俾多D關心？有時我地驗完，都要同你傾架。 5) 俾左錢就當自己係大爺 唔出黎做野都唔知呢個世界有咁多財大氣粗既人，俾左錢就好似咩都要順哂你氣咁。我地雖然係服務性行業，但你俾錢買既係你唔識既專業，唔係我地阿諛奉承。 服務性行業當然都會想為客人提供優質的服務，這一點我相信在各行各業都會是一樣。所以，為了有個更愉快的驗眼過程（或其他服務），希望所有客人都尊重自己，尊重別人啦！:D
