Le Marron 係一間會員制度嘅樓上法式私房菜，之前試過幾次都book唔到下午茶set，今次決定夜晚黎食，估唔到比我預期好味咁多！ 餐廳真係靚既！老婆睇到發哂光，我就欣賞餐廳重視privacy ， 講真食得法國菜都係想慢慢嘆，最好就一路把酒談心，如果俾隔離台聽到交談內容都幾尷尬，但佢地就專登搵左一層層嘅紗廉，將隔離台客人分隔咁，難怪個晚全程都傾得咁開心！ 法國人重視麵包，Le Marron 麵包做得軟棉棉， 除左牛油仲可以配上廚師精心炮製嘅油鴨腿肉醬，第一次試腿肉醬，肉汁好豐富，搽落麵包到仲非常夾！ 法式焗田螺係我幾鐘意嘅一道前菜，香濃嘅牛油配上香草同蒜蓉將螺殼填滿，焗完後完全將螺肉鮮味帶返出黎，而下層薯蓉焗嘅時間岩岩好，唔乾身又吸收哂螺肉鮮味同配料，充滿著陣陣香氣！ 另一道前菜就係香煎法國鵝肝伴蘋果，亦都係另一款幾classic嘅法國前菜，而佢特別在於鵝肝棄用多士改以蘋果伴底，而鵝肝本身好肥美，味道做得好好！ 老婆點法式洋蔥湯，我就要磨菇湯，充斥著香濃嘅磨菇味。雖然賣相無法式洋蔥湯咁特別，但這個湯也是不錯的。 食完雪葩清清味蕾，再來主菜，steak做得好精美，望落細舊其實都好厚身，欣賞佢地做到真正五成熟，外脆內軟，肉質好juicy! 酥皮煙肉大蝦係Le Marron 嘅主打，建議上菜後要馬上食，我地吃完牛扒後才處理大蝦，覺得外皮已經沒最初時香脆，還好蝦肉味道不錯。 甜品揀Dessert Platter就一定無錯，一次過滿足三個願望！無論馬卡龍、cheese cake & chocolate cake 賣相都好精美，作為cheese cake 嘅瘋狂愛好者都覺得依個cheese cake 達中上之作，香濃芝士配上軟身蛋糕，個陣芝士味真係令人回味無窮！ 最後的Apple Crumble，奶酥焗得好鬆軟仲好香，以咁好味嘅甜品完結今餐法國菜！環境同食物都做得咁完美，唔使我講下次老婆都一定會捉我再黎啦！
