同同事傾開講翻上次我哋出trip去新加坡食咗個好好味嘅海南雞飯，好回味，即慶上網睇下有咩海南雞飯好食，收工去試吓。 我哋發現原來有間新加坡過江龍-天天海南雞開咗過嚟香港，仲拎咗米芝蓮。 餐廳環境型格有創意，好有特色，令人印象深刻。 ⭐香茜蟶王 $128 由於我地都好鐘意食芫茜，呢個小食對於我地嚟講係必叫嘅！ 芫茜份量多，仲有木耳絲同蟶子，每啖口感都非常爽脆，而且仲有香濃嘅麻油味，呢個配撘好正，好開胃！ 點擊圖片放大 ⭐天天海南雞(例牌) $158 絕對要連皮食嘅海南雞！ 平時我有食雞走皮嘅習慣，唔係我唔鐘意食，係怕肥怕油膩，好怕雞皮下面嗰舊黃油膏。 喺到食海南雞就冇呢個煩惱，雞皮皮薄爽滑，皮下冇任何多餘脂肪，肉厚嫩滑，雞味濃，而且去骨乾淨，唔會有碎骨。 三款海南雞醬汁都好好味。 ⭐天天石鍋雞飯 $48 雞飯唔係一般油淋淋嗰種雞油飯，食落比較輕盈清爽，雞味香濃之餘，仲帶點斑蘭嘅清香，用石鍋盛載仲可以保持溫度同濕潤。 ⭐海膽豆腐 $148 底下有個火熱住，令到豆腐保持溫度暖暖地同軟身，豆腐豆味香濃，十分滑溜。海膽份量多，鮮味十足！ ⭐Guiness $88 ⭐火龍爆檸 $38 同事飲Guiness，我就試咗個火龍爆檸，用咗火龍果，檸檬，碧螺春綠茶，味道清新，好fresh，而且茶味突出。 ⭐天天特式豆腐花 $0 而家like佢地社交平台就有得送豆腐花！ 呢個豆腐花好有驚喜喎！豆味濃郁，食落香甜，質感滑溜似奶凍。 #天天海南雞飯
