超多朋友都係夏天生日嘅寶寶～所以最近食過嘅強糕真係10隻手指都數唔晒！每次揀蛋糕都會想試下新嘢，但同事又好驚中伏….今日就嚟同大家分享下最近食過，3款非常值得推介俾大家嘅蛋糕！ 生酮の選！Lanala「超級雜莓希臘乳酪芝士蛋糕」 由於生日嘅朋友正努力生酮飲食中~所以都特意訂返個生酮人士都食得嘅cake! Lanala依出品嘅依款「超級雜莓希臘乳酪芝士蛋糕」淨係放喺雪櫃都已經有超大陣乳酪x藍莓嘅香味～再加上夢幻嘅紫白色漸層，望落都想食！ 蛋糕採用希臘乳酪及澳洲SUPERFOOD雜莓製成，感覺上好健康。仲有本人最愛嘅牛油消化餅底，加分！ 點擊圖片放大 +2 入口係帶酸甜嘅雜莓味，口感細緻柔軟。可能係因為依款蛋糕以乳酪為主， Cream Cheese比重較低，就算食得多都唔會覺得膩～而且零罪惡感 參考價格：6”$588 9”$988 Instagram : Lanala_sweets 📍Lanala 尖沙咀分店 尖沙咀彌敦道 100 號 The ONE 4 樓 L410 號舖 📍Lanala 中環分店 中環威靈頓街 39 號六基大廈 G 層 C 鋪 ------------------------- 清新+性價比高の選！holuncake「檸檬蜜糖芝士蛋糕」 一開始係喺INS上俾佢嘅造型吸引～一個個蜂巢Pattern配埋支蜜糖棒超級cutie! 經查詢後估唔到性價比咁高! 於是二話不說即刻訂咗～ 蛋糕餡係檸檬蜜糖芝士，面頭淋上一層薄薄的蜜糖。 入口第一淡充滿檸檬香氣🍋，感覺清新！夾雜著微甜嘅蜜糖同芝士🧀，中間仲食到小小檸檬皮增加口感，配合埋牛油消化餅底，整體酸酸甜甜好開胃，忍唔住一啖接一啖！ 不過食得多就會有小小膩，但幾個朋友分住食就還好！ 參考價格：5” $210 6”$270 8”$450 Instagram : holuncake ------------------------- 打卡の選！Bu Guu Bake House 「茉莉綠茶x日本夏蜜柑蛋糕」 依款係朋友嘅推介～造型真係超！級！靚！再加少少復古嘅感覺，買俾平時鍾意打卡嘅朋友就一定不會錯！ 木棉花一開始係同蛋糕分開，可以俾你自由裝飾！面頭嘅花花葉葉我諗只係裝飾用唔食得的（我地冇食到…）朋友收到蛋糕超級開心，打卡都打咗15分鐘! 茉莉綠茶x日本夏蜜柑配搭非常清新~茉莉綠茶不僅具有茶之甘潤，更富芬芳撲鼻之新鮮花香；配上滿滿日本夏蜜柑及日本高知縣柚子醬，蛋糕充滿柚子香氣🍊。 而蛋糕切開後中間係富層次感嘅海綿蛋糕，仲有蘆薈粒粒同埋蜜柑粒增加口感！ 參考價格：4” $450 6”$630 8”$810 Instagram : buguu Bakehouse
