屋企人係水上人,細細個已經喺船上生活同長大。今次就一於帶兩老上船食海鮮,等佢咃懷緬一下昔日船上生活嘅時光!是次挑選的「大排檔」非常特別,位於銅鑼灣避風塘海中心,需要坐店家提供嘅小艇過去。*所以要記得佢係冇得walk in,一定要提早以whatsapp預約book位及訂餐,暫時只有6:00pm及8:00pm兩輪時段可選。點擊圖片放大 6:00pm準時到達銅鑼灣避風塘,就可以致電店家駛小艇到小碼頭接我哋去「水上大排檔」喇!顯然兩老對於依個體驗見怪不怪,反而係我自己成個大鄉里咁覺得好興奮呢~大約1-2分鐘船程就已經到「水上大排檔」!點擊圖片放大 訂檯時已一併點了4人海鮮餐($1680),所以上到船就直接等食,仲可以欣賞下避風塘日落呢!▼白灼基圍蝦 ▼白灼東風螺 這兩道菜其實沒甚麼技巧,但能吃得出海鮮是新鮮的!白灼已經好鮮甜~▼秘製手撕雞(半隻$170,額外加點) 手撕雞不過不失,肉質不是超嫩的那種...價錢略嫌貴了一點,份量少,不推介點它!▼香炸鮮蝦花姿腐皮卷($170,額外加點) 這個是必點!!!推介!!!! 上檯時仲係熱辣辣脆卜卜,鮮蝦花姿都好爽兼有咬口,而且炸完都冇好油膩的感覺,大家都讚佢好味!▼避風塘豉椒炒蜆 炒蜆都夠鑊氣夠入味,都係不過不失沒太大記憶點。▼避風塘炒肉蟹 肉蟹大隻多肉,用避風塘炒法令肉蟹充滿蒜香同鑊氣,但略嫌炒焦了一點,導致帶出了點苦味。蟹鉗位餐廳已預先幫手扑開咗,輕輕一壓就食到,好方便!▼蒜茸蒸聖子王 蒜茸配海鮮幾乎是不會出錯的組合~聖子新鮮爽口,更吸引嘅係吸晒所有精華嘅粉絲!!▼灼油菜 ▼招牌蟹油炒麵 推介!!!! 沒想到這裡的炒麵才是重點!充滿油香但吃下去又不覺油膩的炒麵,令人忍不住一口接一口的搶著吃,三兩下就把一整碟KO了。吃飽喝足,7:55左右船家又會再安排小艇接載我哋返返小碼頭。點擊圖片放大 今餐飯人均消費約$500~ 食材及食物質素都沒有令人驚艷,比較上係「食」個環境同氣氛,值唔值就見仁見智。有小小可惜嘅係用餐當日撞啱天氣不太好,但整體而言自己同屋企人都覺得成個體驗不錯~都值得嚟一次的!小小心得:💡建議食6pm嗰輪,可以欣賞到避風塘黃昏到晚上的景色。💡餐廳允許自攜飲品,可以買定先上船!💡一定要電話/whatsapp預約及訂餐,大部份菜式都需要先預訂💡平時好易暈船浪嘅朋友記得食定暈浪丸,因為架船都幾搖下。信記避風塘海鮮美食地址 : 銅鑼灣銅鑼灣避風塘賣水站碼頭