年尾想出走，但冇乜假淨又冇太多budget？ 趁住雙11船飛同酒店有平，Nuts就即刻決定weekend過大海梳乎下～ 去澳門唔係赌就係食架啦! 而今次Nuts既目標除左係去澳門美食節外，都係食…..同食XD Budget唔多都食到好多正野架，以下就係nuts既真心推介： 1.世記咖啡 – 豬扒包+奶茶 其實Nuts本身唔太好豬扒包，嫌佢大多都係乾爭爭。 但自從食完世記個豬扒包(MOP $28)就返唔到轉頭，每次過澳門都要食! 個包外層烘到脆卜卜，豬扒唔會太乾太「鞋」口亦醃得算入味，即叫即整熱辣辣。 叫埋支樽裝奶茶(MOP$17) 茶味好濃又夠滑，正！ 地址：氹仔舊城區消防局前地1號地舖 (近官也街) 新馬路賣草地里7-15號長信大廈地下 (近大三巴) 2.六記粥麵 – 水蟹粥 +米通鯪魚球 距離大三巴約15分鐘路程，近十月初五街嘅呢間小店夠晒平、靚、正！ 一入夜就已經多人，唔想等位最好6:30-7:00PM就好到喇。 招牌水蟹粥(每碗) – MOP$80 因為得兩個人食就叫左最細嘅份量，所謂嘅「一碗」其實每人都已經可以分到3-4小碗。粥入面有一隻蟹，蟹都俾想像中多肉。粥底超級~非常~鮮甜，仲有蟹膏香，勁好味，但略嫌唔夠綿。 米通鯪魚球– MOP$55 一客有成10粒，粒粒都脹卜卜大過乒乓波! 落單即炸，所以上枱時係熱辣辣，外脆內彈牙。仲會附上喼汁同蜆蚧汁俾你點，Nuts就覺得鯪魚球同帶鹹香嘅蜆蚧汁比較match! 整體成餐都好滿意，絕對唔會失望! 地址：沙梨頭沙梨頭仁慕巷1號D地舖 3.雅馨緬甸餐廳 – 椰汁雞麵 除左葡國菜之外，澳門三盞燈區嘅緬甸菜亦好出名！ 呢間餐廳價錢親民，所以好多當地人幫襯，午餐時間都9成FULL架。 Nuts今次就試左緬甸傳統菜式椰汁雞麵同魚湯粉。 椰汁雞麵 - MOP$28 雞件嘅份量唔多但好滑，椰汁湯底濃稠度適中，每一條油麵都做到掛湯嘅效果，每一都充滿椰汁香，大推！ 魚湯粉 – MOP$27 本身對魚湯粉好大期望，但反而同想像中有啲出入… 魚湯底薑味好重，原本應該係想辟腥，但反而有小小蓋過左魚香。加上Nuts個人唔太鍾意薑味，所以覺得麻麻。不過想一讚面頭嘅黃豆脆片，脆卜卜令人好想不停食! 地址：新橋(三盞燈/白鴿巢)飛能便度街27號F地下 4. Thailax – 泰式珍珠奶茶 喺香港飲開嘅唔係港式奶茶就係台式珍珠奶茶，Nut喺等車時無意中發現呢間泰式創意飲品店，當然要試試佢! 泰式珍珠奶茶 - MOP$25 泰式奶茶顏色較深，茶味亦俾平時飲開嘅台式珍珠奶茶濃好多，質感幼滑，不過就甜左啲，建議叫少甜/半糖。 地址：官也街廣場巴士站對面 5.安德魯餅店 – 葡撻 呢間咁出名都唔洗多講，靠賣葡撻可以開到咁多分店絕對有佢嘅原因。 葡撻 – MOP$9 新鮮出爐嘅葡撻皮鬆化到不得了，中間蛋嘅部份蛋香濃而滑，每次去澳門總要食返幾個先捨得走! 地址：氹仔舊城區官也街9號栢鴻大廈E座地舖 同場加映: 近年去澳門一定要去打卡嘅新地標 – 巴黎(人)鐵塔… 為澳門之旅劃上圓滿句號啦~
