(2/4/2018更新：小店現在已搬遷至上環，並改名為永樂餃子店，文末地址已經更新^^) 喺鰂魚涌返工，想食個性價比高嘅lunch其實唔易。(表面上係好多選擇，但好多都係貴得嚟質素又平平…)而呢間唔係好起眼嘅小店，就成為咗nuts同同事成日幫襯嘅「飯堂」。 小店只有幾張枱，每到lunch hour都一定見人龍。 雖然又要等、又坐得逼，但都值得架，因為嗰種「家的味道」真係呢度先食到! 講緊嘅係呢度主打嘅花膠淮山豬骨湯底，雖然花膠就搵唔到，但湯底味道清甜又唔會太淡，飲得出係零味精。餃子有10幾款揀，可以選擇叫8隻淨餃($46-50)或5隻餃配麵/米線 ($42)。一個女仔食8隻餃實在太飽濟，nuts通常會叫5隻餃配米線。 試過好幾款，nuts比較推介特別嘅「蕃茄薯仔餃」同「鮮肉香菇粟米餃」，前者係因為坊間少見而味道唔錯; 後者香菇加粟米粒食落有層次感，其實呢度冇一款餃係伏的… 今次試嘅係「鮮肉芝士餃」，粒粒都脹卜卜好飽滿，夠晒真材實料! 水餃皮厚薄適中，唔易穿到漏晒肉汁，又唔會厚到食唔到餡，不過餡嘅芝士味冇想象中咁重。 米線都唔少架，絕對食得飽! 食完餃同米線最緊要飲埋個湯，正到不得了。飲飽食醉，大家都不約而同咁高呼一句：「好滿足呀～」 呢碗$50有找，有「家的味道」嘅靚湯絕對可以為我地呢啲「無飯打工仔」差差電。 永樂餃子店 地址 : 上環禧利街21號地下
