就快又係情人節、新年及櫻花旅遊季喇！ 各位有無試過去旅行俾人托買嘢？ 我就試過好多次，仲遇到好多極品可以同大家share˜ Case1：不如當送俾我嘅生日禮物？ 哇！你買幾百蚊嘢都算，有試過買咗幾千蚊嘢竟然都講得出呢句說話！ 我勁想講我無諗住送咁貴生日禮物比你啊TT或者我根本無諗過送生日禮物比你。 Case2：我而家無錢，出糧之後先還。 呢句嘢最大問題唔係你拖我嗰一陣數，但為你好想同你講：「無錢就唔好買咁多嘢啦！」 當然，刻意拖數的人是例外啦。 Case3：搞錯！未買齊！ 本身托人買嘢就唔一定包買到，我係去旅行，唔係做代購！有試過去旅行，同行的朋友竟然拎住一張A4紙，上面竟然寫滿一張別人托她買的護膚品清單，全部唔同鋪頭買！我嗰下灰咗，滿滿一張A4紙的代購品其實好影響行程，可能仲要逐件同叫人買嘢嗰個人確認，我嗰下唔係怪我個friend，而係諗點解有人做得出叫人買成張A4紙咁長嘅護膚品！人哋就算唔好意思推你，你都唔好咁過份叫人買幾十樣嘢！就算我買到、我拎到、我個旅行箱剩係擺你d嘢得啦！？買唔齊亦唔該唔好發難！重申：我係黎去旅行的！咁高要求自己買！ Case4：乜你買貴咁多？ 如果你無send budget 比我，又無做過資料搜集，又無要求過我咩價錢，買貴真係唔應該怪我，係你自己揀要買嘅！特別係買貴係間鋪收多你，唔係我收咗，唔好好似我呃你咁啦。仲有極品特登揀過平d嘅匯率，好似要喺我身上收番咁。。。唉。。。何必呢？ Case5：其實我都唔係好想要。。。 唔該唔好喺我面前講，特別咁遠同你買同你拎，你同我講唔想要。。。唔想要就唔好叫我買啦！你估我好得閒？ Case6：唔係我要買嗰款喎，點俾反錢你？ 買錯有時唔係我一個人責任，例如對方有無清楚描述？嗰樣嘢係因為要幫你買嘢先會買，我自己根本唔會用，就算買錯咗我有責任，都唔應該由我一個人承擔吧？如果你係去出面代購店，我支持你對方買錯左唔應該要唔應該俾錢。但問題係我係義務幫忙無收你錢，買錯左仲要自己承擔一d自己唔啱用嘅嘢，對我公平嗎？下次都唔敢再幫你買嘢啦！ Case7：有叫過你買咩？ 吓！？ Case8：我分期還俾你oY˜ 你當我財務公司？買$500分5次每次$100？定買$2000分廿次每次$100？分一百期好唔好？好吧我接受，咁利息點計？ 托人買嘢要「先」俾錢是常識吧！我願意幫你墊支一筆清，不代表你可以免息分期吧？有時唔係幾蚊嘅問題，而係。。。好麻煩呀喂！ 提提大家，托人買嘢還是要有基本的禮貌啊！如果你需要售後服務請找專業代購，需要分期請找財務公司，友情是經不起考驗的啊！ 代購真的很易傷感情，如果你脾氣好到1-8都能接受，恭喜你！你已找到情比金堅的摯友！否則安全起見，代購就留返EQ高的人去做啦！ Facebook: http://facebook.com/bellybei
