今日帶咗一個親子攀石活動，當中有好多場面令到我好感動，令我諗到有三樣嘢喺親子關係裏面係好重要。首先，喺眼前嘅重點放喺邊，攀石活動開始前會有一名小朋友同埋佢嘅家長一齊上去攀石，有玩過攀石嘅人都知道，攀爬嘅時候應該集中望自己嘅攀爬路線，但呢一班家長選擇集中望住自己嘅仔女，望實自己嘅仔女一舉一動，係適合嘅時間鼓勵佢哋同佢地講聲：加油，你得嘅！喺小朋友無助嘅時候會提出幫助同埋選擇，提議佢哋可以踩住邊一嚿石頭，隻手伸直拎邊一舊石頭。家長自己就選擇固定喺度望住自己嘅仔女一步一步咁往上爬，無論自己固定喺度有幾咁辛苦隻手有幾咁攰，都選擇望住自己嘅仔女幫助佢哋。第二，站在他人嘅角度思考，感受佢哋當刻嘅感覺係點。好多家長未開始玩嘅時候望住前面嗰一組都會好輕鬆咁講點樣攀爬，但當自己爬嘅時候就會開始明白當刻嘅感覺係點，無助、恐怕、擔心⋯⋯有太多嘅情緒影響，拎到攀爬嘅時候根本思考唔到點樣攀爬。但當家長同小朋友一齊攀爬嘅時候，家長選擇教導小朋友之餘，會講出：我明白小朋友驚啲咩嘢，同佢地講只要伸直隻手拎住舊石頭隻手就唔會咁攰，我知道你而家隻手好攰好震，但只要你肯伸直拎上高嘅石頭就解決得到。當小朋友知道家長明白佢當下嘅心情後，明顯會更願意聆聽同埋實行家長提出嘅意見，依一點證實咗只要你企喺人哋嘅角度思考後，講出佢而家當刻嘅心情並提出解決方法別人會更願意聆聽同埋接受你嘅意見。最後，大人始終係小朋友嘅模仿對象。有一個小朋友爬到中間，明顯係好攰同埋唔識得向上爬，佢嘅爸爸就同佢講：係咪唔得呀！落去啦！同教練講落去呀！但係小朋友見到爸爸爬到咁高，即刻同爸爸講：我唔要落去！其實小朋友見到爸爸爬到咁高自己都好希望好似爸爸一樣，可以爬到咁高，最後嗰位小朋友爬到爸爸嘅身邊，然之後好開心咁一齊落返嚟。只要家長喺小朋友面前做得更好，小朋友易會像你一樣嘢作為目標，追趕自己嘅父母，希望達到同父母一樣嘅水平，得到父母嘅認同同埋讚賞，一樣就係小朋友最希望得到嘅嘢。短短嘅活動裏面，家長同小朋友發生咗好多嘢，希望將來嘅日子可以做到真誠對話，將自己當刻嘅感受同埋目標講比對方知，共同努力共同進步。希望睇到呢篇文章嘅人都可以運用到當中嘅道理，將目光放喺小朋友身上，企喺小朋友嘅角度思考並提出建議方法同埋真誠對話。
