相信大部份去過美容院嘅女士都會有一個迷思，究竟我做緊嗰個facial係咪有用呢？甚至乎，我做緊嗰個facial究竟係咩嚟㗎？ 通常facial名都會比較難記，因為多數美容院都會將個廠商定嘅名字，轉換成一個有品牌特色嘅名字（通常都係奇怪又難記，聽完都唔知係咩嚟）。所以作為一個精明消費者，一定要知自己做緊啲咩！ 認真嚟計，facial可以細分好多種，技術包羅萬有。為咗方便大家容易理解，可以將facial大致分為「護理性」同「治療性」，醫學針劑類facial今次就不作討論。 「護理性」facial主要係針對日常皮膚狀況同變化。呢類facial包括補濕、清潔、減淡黑眼圈（與「去黑眼圈」不同）、嫩膚、排毒、去水腫 etc。呢類facial有個特點，就係越做得密效果越好，但唔做一排其實會打回原形。原因唔係facial唔work，而係因為呢類facial都係解決緊大家日常生活習慣唔良好而帶來嘅問題，eg. 夜瞓、少飲水、落妝唔乾淨、少敷mask、食重口味煎炸野多etc，並非喺結構上作出改變。「護理性」facial就好似刷牙，因為大家每日食嘢整污糟咗啲牙，係應該恒常咁刷牙，刷完會乾淨一陣但幾日唔刷又會累積污垢。 「治療性」facial就有特定療程期，做完若干次就會有明顯改善，短時間內唔需要再做。呢類facial就包括打斑、收毛孔、去印、脫毛、拉提 etc。呢類facial會比「護理性」facial昂貴，但需要次數不多且間距比較遠（大約十次內，每個月做或2-3個月做一次），因為多數係由皮膚結構上解決問題。「治療性」facial就好似箍牙，正常箍完成個療程之後你會發現有明顯改善，而之後只需要定期做小保養。 總括嚟講，「護理性」facial係應該日常生活裏定期去做，而大部份呢類facial都係價錢相宜比較容易負擔。而是否需要「治療性」facial，則好視乎大家本身嘅要求同財力，而呢類facial就屬於會有明顯效果同滿足感嘅消費。
