「係咪要去做facial」係我做呢行咁耐見好多女士都糾結嘅問題之一。去做facial嘅原因當然不外乎貪靚啦，但唔去做facial嘅原因又有好多，eg. 怕貴、怕hard sell、怕唔衞生、怕煩、唔識揀…其實做唔做facial，可以從兩個角度去睇。第一係你嘅「要求」，即係你想要「幾快」同「幾見效」。 靚皮膚嘅定義每人唔同。唔好講到零毛孔白裏透紅咁極端，但相信大部份人都唔想自己塊面有肉眼見到嘅大瑕疵，eg. 凹凸洞、斑、暗瘡… 如果你一啲都冇咁我真係恭喜你，護膚真係少好多麻煩。家居護理Homecare最大賣點係方便同平，但有啲針對性嘅問題家居護理係幫唔到或者進展好慢，eg. 去紋、抗皺、淡斑、收毛孔、去印...（基本上佔八成皮膚問題）。主要原因係我地嘅角質層係一個好好嘅天然屏障去保護自身肌膚，大部分外敷用品嘅active ingredient都唔容易進入皮膚底層，就算進入到都唔係多。試問active ingredient連入都入得唔多，又點能夠發揮功效呢？而做facial就會用有科學根據嘅儀器機、treatment（假設嗰間美容院係有良心），提供足夠嘅能量/ 令active ingredient去到皮膚底層，從而令到皮膚由根本出現變化。另一個做唔做facial嘅答案就取決於「生活習慣」：你本身可以有幾勤力去護膚？ 都市人生活習慣唔好都係令到做facial更有效嘅主要原因之一。令到皮膚好嘅習慣相信大家都知：勤力護膚、瞓夠8個鐘、日飲8杯水、唔食油膩重口味嘢、工作冇壓力、天氣唔特變唔潮濕...，問題係日常生活裏你做到幾多樣呢？有時香港嘅生活節奏不其然會令我地變得「懶惰」，寧願花時間休息、娛樂、放縱，從而未能夠做足保養、未能養成對皮膚好嘅習慣。做facial就好似減肥跟營養師餐單一樣，而唔係完全一刀切要唔食嘢咁減法。務求喺唔太影響到現行生活習慣嘅情況之下，透過科學技術去做到理想嘅護膚效果。「做唔做facial」，其實真係因人而異。如果你自問都係一個對自己皮膚有「基本要求」，唔想照鏡望到有咁多瑕疵，而又係一個每天忙碌嘅「都市人」，咁可能做facial真係一個幫到你省時又見效嘅活動。所以你要問嘅問題就應該係「究竟我啱做咩facial呢？」
