這是一趟青春熱血的旅程！有人說：青春是衝動的過程。 我們，就是靠一點點衝動，一點點輕狂，踏上了11天青藏之旅。這一年我們24歲，相識了12年。 這11天的旅程， 對我們來說， 是體力的挑戰、耐性的磨練、心靈上的一點點成長！這旅程是浪漫的, 浪漫在我們可以放慢腳步，花一點時間坐下來寫生，坐在廟內呆一下，可以在夜間走出去看一看星星。 當地人說：西藏是眼睛的天堂，身體的地獄。我們確切感受到了！ 2016-09-08 [香港>深圳] 由於想慳番啲時間同深圳機場出發會平啲，我地一放工就去搭直通巴士去深圳。過關去深圳機場附近要兩個半鐘，係機場附近酒店整理好個人執好行李訓一晚就出發！旅程中最驚險嘅事係呢日朝早收到旅行社電話，竟然同我地講話原本聽朝8點果班機取消左！！！好彩再三詢問下之後知道同日朝早6點(早左2粒鐘)有另一班機可以轉。真係差啲嚇死！ 2016-09-09 [深圳>西寧] 深圳去西寧連中途站停一停西安大概５個鐘左右。去到西寧放好行李，我地就係市內行行企企逛逛，誤打誤撞去左丁香園，再走到南禪寺同鳳凰臺邊嘅觀景台，遠眺西寧成個城市嘅景色。 企係南禪寺入面FEEEEEEEEL到果份寧靜，個種CALM呢我地一致覺得係成個TRIP最享受的一下！心中嘅一刻平靜對平日勞碌嘅我地黎講真係好！珍！貴！ 2016-09-10 [西寧>青海湖] 由西寧出發去青海湖途中， 我地先去左達玉部落原生態文化村參觀，再去日月山同埋金銀灘草原。沿路兩邊都是係青綠嘅草原，呀，心，曠，神，怡。青海湖係中國最大嘅內陸湖，我地輕輕試左下青海湖嘅湖水，又真係咸咸地架喎。哈哈。夜晚，係青海湖附近賞星望月，啊，簡單又愉快咁過左一個夜晚。 2016-09-11 [青海湖>西寧] 為左係青海湖邊睇看日出，我地一早起身，唔知係心理感覺定係因為海拔高，總係覺得個日個太陽特別大、特別圓！之後我地去左有中國天空之鏡之稱既茶卡鹽湖 ，加上個日遊客人數唔算超多，天氣又好，確實有種，豁，然開，朗，既感覺。於是，好奇既小朋友執起地上既鹽，又舔了一下，很鹹啊～～～ 2016-09-12 [西寧>拉薩] 西寧到拉薩嘅火車足足22小時，我地前一晚8點上火車，預計到達時間係第二日嘅晚上6點！我地三個訓既係硬卧，同另外三個乘客住係同一個「房間」！途中經過可可西里自然保育區，一大片草原，加上個望唔到有幾遠既藍天，同其他人吹下水、再加上我地三個都開始有啲唔舒服，訓下，HAE下，畫下畫，其實時間都算過得幾快。 2016-09-13 [拉薩] 係拉薩市內嘅時間只有一日，於是我地就好好把握時間(見自己仲後生)，去左布達拉宮，大昭寺， 八廓街。係標誌嘅布達拉宮前影相好似完成左一個人生願望，bucket list CHECKED! 最享受嘅時刻就梗係我地坐係布達拉宮廣場度等睇夜景，傾下計，寫下生，影下相。。。(呀！人生！) 2016-09-14 [拉薩>納木錯 ] 呢日唯一行程係去納木錯， 旅程平均海拔有成4千幾，而且旅程中可以一次過體驗春夏秋冬四季，聽講佢嘅湖水亦會跟隨天氣變色！去到一半漫山都係白茫茫嘅雪，如果持續落大雪，園區就會唔開，咁就白走一趟！導遊說：今天我們到納木錯，不管湖水是藍嘅、白嘅、灰嘅，我地都係幸運嘅！(老土得黎又好似幾岩喎) 2016-09-15 [拉薩>日喀則 ] 食個早餐之後就前往日喀則， 中途經過羊卓雍錯(姐係羊湖)同卡若拉冰川。羊卓雍錯係西藏三大聖湖之一，係藏語有天鵝湖嘅意思。呢個湖係我地最鐘意嘅一個！湖水清澈見底同埋真係湖水藍色架，如果你好鐘意Tiffany blue, 呢個一定係你嘅首選！由於視野廣闊嘅關係，又再用心，曠，神，怡，黎形容真係無錯！ 2016-09-16 [日喀則 >珠峰] 8點半食左個豐富早餐之後，我地先去左參觀紮什倫布寺。之後就開始長達10個鐘去珠峰大本營嘅漫~~~~長~~~~~車程，大部分時間都係屈係車度，坐到腳都痺。唔好以為10個鐘訓下好快過，由於海拔一路升，比較易有高反，沿途其實係無！得！訓！仲要隔一至兩個鐘就要過檢查哨。去到夜晚成8點幾先到大本營！你都咪話唔辛苦！ 2016-09-17 [珠峰>日喀則 ] 前一晚係大本營同其他團友閒話家常，黎個文化交流，賞下月，觀下星，食個香港帶去嘅溫馨月餅。第二朝係番日喀則前， 我們一早搭車去到靠近珠峰的遊客區遠望一下珠穆朗瑪峰，亦即係世界第一高峰聖母峰。係小丘下遠望，天氣看來不錯，但短短10分鐘就突然有大片雲霧將珠峰遮住，咩都睇唔到，好彩我地都影左幾張相。睇黎，要睇到珠峰真係要講一種緣。 2016-09-18 [日喀則 >拉薩] 經過一整日嘅車程, 我地番到拉薩市。最後一天當然係買手信， 寄明信片同埋食餐好。前者首推八廓街，後者可以去布達布宮隔離嘅天上西藏主題郵局，入面有唔同嘅明信片同埋西藏獨有嘅郵戳！正！前幾日不停都係食團餐，所以最後一晚我地決定對自己好啲，去打個西藏邊爐再去風轉咖啡館飲杯野，為呢個難忘之旅畫個靚靚句號！ 2016-09-19 [拉薩>香港] 最後一天嘅時間全部都用係交通上。拉薩貢嘎機場離市區約一小時車程，所以即使是最後一天我地都係要6點起身！係拉薩返香港果程我地係成都轉機，但同平時唔同，係成都我地要如常咁等行李之後再去check-in，再過安檢，再再上機! 好彩我地有預足時間，平平安安順利返到香港！番到黎，第一件事，由於太肚餓，所以仆左去食左餐M記，完。
