今年二月，我終於頂唔順個智障老闆，遞咗辭職信。我又唔係做私家看護，點識照顧精神病人。 辭職有分兩種。一種係「保持實力沉默是金低調型」：月頭辭職，咪乖乖哋計足一個月通知期月尾離職囉。第二種呢，叫「忍你好耐阿叔劈炮唔撈喇扣埋假我而家就行出呢個門口吹咩型」，簡稱好型咁啦。 我當然係屬於後者，仲要攞埋年尾花紅即閃個隻。有啲工，你就係永遠唔會後悔當日行出咗公司個門口。 想開始過新生活，其實好易，夠薑就得。咩都唔好諗，遞咗信，你就係神仙。 過去兩個月，我過住好似伊甸園一樣嘅生活。每日瞓到自然醒，煮個健康早午餐，鍾意去跑個步，睇場電影睇吓書。輕鬆夠喇，就開始工作。Freelance嘅好處就係可以自己安排時間，要夾時間同friend出去玩嘅咪開個夜車搞返掂囉，自己話事，而且仲可以揀客。想去旅行唔洗同人請假，唔洗公眾假期捱貴機票。 我知社會仲有好多人一聽到你無正職就下巴都差啲跌落地，好似人生一定要不斷工作直到六十歲退休咁，一個break都唔俾有。辭職之前我都驚會唔會財政上維持唔到，而為咗抗衡「你無工返即係等乞食的廢青」呢種眼光，我特登等埋份花紅先走，咁就算一兩個月搵唔到工都唔會餓死，住……嗱唔係我信邪，但好似《牧羊少年奇幻之旅》話齋：「當你真心渴望某樣東西時，整個宇宙都會聯合起來幫助你完成。」自從賦閒在家之後，第一次嘗試靠新技能搵錢，無心插柳柳成蔭，工作嘅機會一個接一個無停過，而且仲不斷有新類型嘅job，好有二次成長嘅感覺。 有次包咗一日車同個台灣朋友喺香港玩一日，同個男司機傾開，原來佢都係祼辭咗，靠教琴同得閒揸車搵食，想留多啲時間陪三個月大嘅仔同屋企。佢話教琴時間好彈性，Uber又唔會對司機接單數目同時間有要求，鍾意就上線唔鍾意就喺屋企抖，最啱就係見鏠插針，用嚟塞滿天地堂中間嘅空檔。聽佢咁講，我又膽粗粗用咗佢個介紹碼登記做司機。雖然我接單唔多，但總算可以幫補吓。以前係我每個月養車，而家係車養返我轉頭。 結果埋單計數，文字工作加揸車，一個月搵得仲多過之前份正職一大截。吓……咁樣我仲點有動力搵工呀？而且少咗搭車過海、焗住出去食lunch嘅洗費，我仲儲多咗錢可以做啲小投資。 其實最開心係有人欣賞自己。唔試過，係唔會知自己唔坐office都餓唔死。老實講，嗰種成就感係相當之飽肚。 絕對唔係幫某大求職網站賣廣告。但有晚好夜收工，做到心灰意冷，行經灣仔會展天橋，旁邊有個超大嘅廣告牌寫住「Happy is a better job」，頂你真係當頭棒喝。做咩要為嗰一萬幾千受盡唔人道對待，OT無補水無得升每年加薪幅度都追唔上通脹先？既然去少次日本旅行都買唔到樓架啦，點解唔換一個方式，唔好俾份工綁住，好好呼吸一吓生活，做自己老闆？ 信我，Life is too short for a shitty job。 __________________ 如果你都想登記做Uber司機，加入車養人嘅行列，可以用我B612專屬嘅介紹碼去呢條link登記：https://partners.uber.com/i/8mhpdjjhue 而家成功登記之後 週末五六日 之內接滿 12 單生意，仲可以有 $3000 獎金添。喂肥水不流別人田，望吓又無蝕底，撳入去睇咗詳情再決定囉：http://goo.gl/0cz1dH ************************************ 網絡作家b612 – facebook專頁： b612lpp （鍾意睇嘅去俾個like，支持吓我繼續寫嘢吖！:)） 「倘若有一個人對一朵花情有獨鍾，而那朵花在浩瀚的星河中，僅此一朵。那麼，他只要仰望繁星點點，就心滿意足了。於是他喃喃自語：『我的花就在星河的某個角落』可是，這花一旦被羊吃掉了，瞬間，所有星星也將隨之黯淡無光。那你也認為這不重要嗎？」
