（寫於2016年1月份） 最近Twins 開演唱會，好多人話唔明佢地唱歌咁難聽又走音又盛，做乜會成為我哋呢一代嘅集體回憶。 點解大家就係唔明，呢個就叫市場分工 —— 如果我想聽有唱功嘅，我做咩唔去聽陳奕迅、張敬軒、容祖兒呢？要聽Twins，就係因為佢哋夠青春。《明愛暗戀補習社》、《戀愛大過天》、《女校男生》、《風箏與風》……由佢哋出道開始爆紅嗰吓你就知，Twins 嘅賣點係校園、Sell 共鳴。呢幾首歌當年炙手可熱嘅程度，係連男同學都會識背晒全首。 Twins 嘅歌，係陪住每個係香港讀書嘅學生長大，香港樂壇並唔係好多其他歌手或者組合做到。大家所有嘅青春回憶，Twins 都從不缺席。 由情竇初開，見到人哋拍拖心郁郁想試……「讓我膚淺 只知戀愛大過天」 暗戀咗隔離班個插班生，但又唔知點表白……「問愛戀易學難精 可否惡補」 點知原來你好姊妹同你暗戀埋同一個人……「告訴我其實你 原來曾為了他」 情人節到喇，但劉華約嗰個唔係你……「今晚我愛的人 在散心」 終於你醒覺，要改變吓自己嘅形象吸引人……「我淨係想試吓做女人 扮吓女神」 然後遇到那個他……「冥冥中遇上他 擦過愛的天空」 拍過拖，先發現原來無想像中咁美好……「人天生根本都不可以 愛死身邊的一個」 嗌交吵大穫，仲上上吓堂喊埋出嚟……「咖啡杯都企不穩 我忍」 第一次拍拖，再第一次失戀……「我最初面紅 現在雙眼通紅」 失過戀，先叫大個架嘛……「明白小小的失戀不害人 更加添我成熟感」 好快就畢業，先知 道自己唔想時間過得咁快……「原來朋友仔感情再天真 亦是我永遠也會愛惜的人」 原來自己係幾咁唔想做大人……「不要走 大鐘即使敲響 你別放開手」 就算畢咗業，見返舊同學，其實好多嘢都留喺心入面無變過……「就算忘了功課 我們記得怎坐」 你絕對可以唔鍾意食麥當勞，話佢拖低香港飲食業質素。但食得多放題、Fine Dining，間中放肆吓食垃圾食物有咩問題呢？有邊個中學唔係三日唔埋兩日食一餐麥記咁大嘅？唔同年紀就係有唔同嘅需要架啦。 唔理你覺得佢哋有幾唔掂，我就係鍾意同班中同唱K 點足幾版Twins 嘅歌，然後一字不錯連獨白唱出嚟（「以後我都無掂過個結他，至於暑假……」），再瘋狂取笑對方當年點解鬼掩眼暗戀邊個邊個…… 「一開心唱飲歌 不開心唱飲歌 當中紀錄我這麼長大過」 :) ************************************ 網絡作家 B612 – Facebook專頁： b612lpp（鍾意睇嘅去俾個like，支持吓我繼續寫嘢吖！:)） 「倘若有一個人對一朵花情有獨鍾，而那朵花在浩瀚的星河中，僅此一朵。那麼，他只要仰望繁星點點，就心滿意足了。於是他喃喃自語：『我的花就在星河的某個角落』可是，這花一旦被羊吃掉了，瞬間，所有星星也將隨之黯淡無光。那你也認為這不重要嗎？」
