20150102 - 時新快餐店 姑姑男友好鐘意鄭秀文，幾經辛苦之下，姑姑搵到朋友買到兩張第A行既尾場尾！！姑姑男友開心到傻左，所以男友話同姑姑去食好想食既時新快餐店！ 姑姑幾年前食過1次覺得真係好好食，但紅磡對於住港島既姑姑黎講有DD遠，姑姑唔會無啦啦走去食 一收工過到去好多人，姑姑就去霸位先，男友去買野食 諗左陣都係決定叫雙層漢堡芝士蛋包(沙律汁)，始終姑姑覺得食返人地出名既野好D, 下次先試其他啦 坦白講，姑姑覺得幾年前食好食好多，不過今時今日都係要睇下價錢先，HKD20.00 有個咁大既漢堡包食真係難DD，點都好食過麥記/ KFC/ BURGER KING果D先啦 姑姑覺得食野有時係食記憶，你記住自己細個時食既味道，到你大個食返，可能人地做法其實冇變過，不過你就係食唔返果種既味道！ 其實有好多野都會影響你既味覺，科學D講，其實舌頭既味蕾只會做到4種味：甜、酸、苦、咸 (辣只係熱，唔係味道)，你之所以食到有其他味，係因為你既臭覺，例如士多啤梨味呢D都係因為你既臭覺聞到。所以點解你覺得感冒時食野冇咩味都係呢個原因 而姑姑認為點解我地食唔到想當年既味道，除左上面既原因，亦可能因為你而家食既環境唔一樣，唔係講食店既裝修，而係講你同咩人去食同埋你當時食既心情！ 講講下愈講愈遠，食漢堡包又點可以唔食薯條呢:！始終都係波浪薯條好食！ 雖然姑姑話冇以前咁好食，不過姑姑覺得都仲係值得一試，始終，香港地已經冇咩呢D舊式快餐店了 今餐盛惠HKD36.00 /人 好食指數：7/10 抵食指數：8/10 服務指數：不適用，因為自助 地址：紅磡黃埔街1A地下
