20141214 - Green Waffle Diner 姑姑同男友去左行工展會 (每年例行活動) 本身就打算係入面食埋野，行完就返屋企，發現而家工展會既野唔係俾香港人食的，貴到呢... 結果行完，要走去搵野食！因為拎住太多野，所以唔想行去太遠食，就行左去JP睇下，睇睇下見到有WAFFLE，打算試下 (姑姑同男友都唔係好食甜野，除非發口痕，所以就入左去) 其實環境唔太差，感覺幾光幾乾淨，唯一姑姑唔鍾意既地方就係佢冇牆，好似食動物園咁(無錯！姑姑係果隻猩猩) 其實姑姑真係想食WAFFLE先入黎食架，但係姑姑同男友見到D款都有D驚 (全部都好似好甜咁) 所以我地放棄食WAFFLE，叫其他野食算了 揀左好耐，終於揀左個焗肉醬鑊仔意粉(無錯！揀咁耐都係食肉醬意粉) 喂喂！又幾好食喎！好香，因為有好多芝士，唔錯唔錯！ 姑姑同男友都好鐘意食雞翼架！所以忍唔住都叫左個香脆雞翼配水牛醬汁(中辣) ，姑姑冇男友咁食得辣，不過對姑姑黎講都算好辣！味道好夾，話就話香脆，不過佢個皮似係煎香多D，完全唔會食到成口粉，黎到真係要試下！ 好味指數：8/10 抵食指數：7/10 服務指數：6.5/10 地址：銅鑼灣百德新街22-36號翡翠明珠廣場1樓10號舖
