最近成日心思思想食台式火鍋，心癮起即刻約friend去咗佐敦呢間放題店止一止渴。呢度最特別係可以揀兩小時或者無限時任食，價錢當然有分別，但兩小時嘅LV2餐 ($388/位) 真係性價比最高，唔單止食物選擇多，仲送特大台式飲品，連Stella生啤同韓國燒酒都任飲。湯底有成20款揀，我哋揀咗藥膳養生花膠雞鍋，一上枱已經聞到陣陣藥膳味，飲落口清香得嚟唔會太過搶，花膠同雞件份量俾得大方。肉類首推呢款Prime Grade牛頸脊，雪花分布均勻，厚薄切得啱啱好，淥八至十秒入口，有油香之餘仲保留到牛肉嘅咬口。另一款牛胛肉就牛味更濃，肉質結實有嚼勁。黑毛豬油脂分布靚，淥到變色就食得，嗰種油香同肉味平衡得好好，同平時食開嘅豬肉片完全係兩個層次。至於無激素豬肉片就肥瘦適中，淥完都唔會柴皮。呢個餐另一個亮點係海鮮陣容。蟶子皇完全冇沙，淥完捲起嚟食，爽彈到似食緊新鮮魷魚。廣島蠔隻隻都肥嘟嘟脹卜卜，淥完都冇縮水。鮑魚、九節蝦同游水海蝦夠新鮮。沙白蜆吐沙吐得乾淨。白鱔片同脆肉鯇都切得厚身，好食。手工火鍋料驚喜連連，黑松露墨魚滑係必食Item。潮汕手工丸入面，爆醬濃芝牛丸最過癮，一咬開真係流出熱辣辣芝士漿。麻辣牛丸就辣得過癮。仲有幾款自家包嘅水餃，香菇雞軟骨餃口感好特別。最估唔到係有芫茜燒賣，芫荽控見到一定會瘋狂點嚟食。仲有好多夜市小食夠晒台灣Feel，炸花枝丸真係有台灣夜市水準，外層金黃香脆，入面仲食到花枝粒。炸雞翼醃得入味，炸到乾身唔油膩。最後甜品有我最愛嘅Movenpick雪糕，另外仲有dreyer's、牛奶公司同幾款香港製造嘅雪糕牌子可以揀，真係大滿足。點擊圖片放大 +5 鍋霸吃到飽台式養生火鍋：佐敦彌敦道219號莊士倫敦廣場6樓
