呢間餐廳嘅裝修好似走咗入濟州島嘅火山洞穴咁，好特別。不過，最令我期待嘅，當然係佢哋由韓國訂造嘅火山石烤盤，配埋獨家低溫熟成嘅黑毛豬，仲有店員幫手燒埋，全程坐定定等食，所以早就bookmark咗一定要嚟。一坐低，店員好快就送上六格前菜之餘，仲會將泡菜、蒜頭、菇類同埋一小片香橙放上石板邊，一路燒肉一路烘熱佢，到時就可以夾住烤肉一齊食。Pork Box set $658呢個set上枱嗰下真係幾驚喜，佢用個好似魔法書嘅盒裝住，店員會即場點火燒一燒，個盒面會有火焰效果，玩味十足。打開之後，入面超級豐富，有成四款肉，份量十足。五花肉 (150g)：望落去肥瘦分明，店員將佢燒到外層微微焦香，食落一啲都唔油膩，入面仲保持到肉汁，肉質好有嚼勁。豬頰肉 (150g)：肉質帶少少膠質同軟筋，燒完之後入口彈牙得嚟又夠軟嫩，一啲都唔會乾爭爭，亦食唔到有豬腥味。豬頸肉 (150g)：同樣係豬，但豬頸肉就係另一種口感。佢帶有獨特嘅脆爽感，入口油脂香勁豐富。牛舌 (150g)：呢個牛舌真係要俾個Like！店員會原條燒一陣，再剪成細細粒慢慢燒。牛舌入口外層微脆，中間係粉紅色肉質軟嫩又爽口！腌製魷魚粒炒飯/炸醬拉麵（跟套餐：二選一）我哋揀咗呢個炒飯 (另加芝士&太陽蛋 +$20)，石鍋熱辣辣。魷魚粒幾彈牙，炒飯炒到粒粒分明，上面鋪滿紫菜、蔥花，仲有拉絲芝士同太陽蛋。將所有嘢撈勻，一啖飯一啖肉，真係好食到停唔到口。粟米芝士蒸蛋 (+$68)跟餐加嘅蒸蛋，一上枱真係要快手打卡，因為佢脹卜卜咁，好似一個半圓形嘅頂蓋，空氣流走後就會塌，影相要快！質地比平時食開嘅蒸蛋濕潤少少，口感軟熟，加上入面有粟米同超多邪惡芝士，飽肚又滿足。套餐包兩杯野飲，我哋各加$10選了特飲，兩杯都有濟州石頭公公仔造型嘅冰塊，真係超級可愛！濟州島石爺朱古力沙冰：朱古力味好濃郁，沙冰打得細滑，冰涼透心，飲落清新又解膩。濟州爺爺金桔百香果梳打：味道酸甜醒神，百香果味突出，正好中和返燒肉嘅油膩感。點擊圖片放大 +5 The Jeju岩洞餐廳：銅鑼灣駱克道491-499號京都廣場2樓
