1/11/2020晚上7點前要入院, 因為疫情關係, 陪我入院的家人都要登記資料. 搞入院連度高量體重問病歷等等約30-45分鐘就入床. WINDOW 床位加多幾十蚊, 我加咗. 不過個景係對住幅牆, 我頂…… (算啦, 多咗條邊俾我放野都好…) 本來諗住7點零可以同屋企人喺醫院食下野 (絕對不能夠出院食野, 因為當保險公司知你有出過去, 有機會會CLAIM 唔到…), 但又因為疫情關係餐廳無開… :’( 咁好啦, 我只能係床上食醫院餐, 我屋企人就去九龍城食牛肉包嗚嗚… 飯都未黎, 護士就黎抽血了 (我好驚), 跟住就做COVID TEST, 然後佢仲想做埋剃毛同放便… 我求佢可唔可以俾我食埋飯等陣先, 佢話OK. 飯唔算難食, 但無港怡果D咁好食, 價錢都好合理, 所以唔好比較了. 護士話咁又返黎了. 剃毛: 只覺得尷尬, 無唔舒服 放便: 呢個簡直就係成個手術過程最痛的一環! 我唔明點解要佢幫我, 我唔可以自己黎☹ 佢一拮落去果野我係痛到無法形容, 佢叫我放鬆後再隊多野都係好痛:’( 之後佢叫我HOLD 10分鐘後去廁所, 但我好似無2分鐘已經頂唔順要爆了… 事後話: 我出院後返屋企個屁眼痛足2星期, 仲要每次大便都有血… 好明顯係護士隊損咗我, 搞到我肛裂…… 真係好痛…… 沖涼後護士叫我晚上食埋消夜就早D訓聽朝7:30做手術, 我好似睇波睇到成2點先訓, 因為我唔想咁清醒去面對呢個手術… 真係好驚呀☹個瘤同我個人一樣, 肥肥大大... 2/11/2020 雖然係好夜訓, 但第二朝係會好醒, 因為就黎要行刑. 先食止痛藥, 之後換衫, 再有張床推你落去, 果下我已經成個身震緊. 去到手術室外準備, 發現好熱鬧 – 有N個人都同我一樣要做唔同的手術喺度等緊, 好似CAR PARK 一個一個泊好等入手術室. 一如以往, 叫你對下係咪你個簽名, 係咪做乜乜手術… 基本上都驚到全部答 “係”, 但其實乜都入唔到腦.入到手術室, 醫生講過D乜都唔記得了, 麻醉科醫生都係講果幾句, 叫你大力吸, 氧氣黎. 今次係第5次全身麻醉, 終於俾我見到佢打咗支針落去, 我本能地去抵抗麻醉藥的作用, 當然, 唔夠5秒就訓咗… 起返身, 醫生話手術好成功 (病人都無死到), 係用多咗時間去止血, 因為流血比較多. 其實個人仲好迷糊, 跟住有人推你上房, 我話好痛, 護士話吊緊止痛, 一陣就會唔痛. 約半個鐘後又真係無咁痛. 全日唔落得床, 已插尿喉, 所以唔會覺得急尿. 我本身M到, 同埋做完手術都會有啡色物流出, 所以醫院都有幫我墊M巾. 成個人好攰, 勁訓. 去到夜晚好餓但仲未食得野. 我跪求護士俾粒糖我食. 佢好好, 俾咗2粒我, 但叫我唔好吞落肚 (我啋佢都傻). 感覺上係呢2粒糖救咗我. 本來我成身唔舒服, 好似發燒咁, 食完就成個人舒服哂, 終於訓到第二朝. 3/11/2020 醫生黎睇我傷口, 很好, 尋日驗咗2次血 (由好驚去到無感覺), 佢話因為流咗好多血, 要睇下我洗唔洗輪血所以先驗2次, 但指數都穏定. 可以食粥 (重生了), 同埋拆尿喉 (少痛). 行下放下氣 (屁). 基本上除咗肚臍位郁到的時候會有少少痛, 其他都無乜野. 麻醉藥可能每個人反應都唔同, 我每次都要1-2星期先會好返 (未好返係會好似發燒咁, 又咳, 又成身唔舒服, 要訓好多, 等等…) 晚上叫飯食 (但其實係唔岩架, 要食流質野架), 等朝等出院 😊 4/11/2020 醫生一早黎做FINAL CHECK 可以出院, 食完早餐去樓下交錢, 攞藥, 執野, 走人😊基本上成個人行得走得, 最搞笑我去攞藥時, 個護士叫我叫個病人出黎, 我話, 我就係個病人… (好明顯我好精神)瘤是良性的 (唯一安慰) 少少備忘:- 醫院LIST 隨便上網都揾到, 我覺得最緊要帶外套. 醫院冷氣真係好凍~_~- 埋單7萬左右. 預備好幾張信用咭, 入院前睇下邊張找住院費最有著數 (去MONEY HERO 等等網站就有了)- 帶自己鍾意食的東西(唔好好似我咁, 想食粒糖都無...), 我記憶中佢地個MENU 唔係有太多野食揀… 不過樓下都有PACIFIC COFFEE的 手術後要做的事…醫生建議我打4枝停經針, 為期半年, 如果唔係好易返發 (本身呢個瘤就係好易會復發). 其實我都無得揀架啦, 都係要打. 至於長遠可以點樣避免復發 (除了果D唔好食咁多雞翼呀, 補品呀, 燕窩呀…) 我真係無乜頭緒. 希望醫療科技可以快D 研究到啦, 我唔想幾年後又入院呀…. ☹ (PS: 枝針好Q痛, 好Q痛, 好Q痛)
