又要做手術嘞 :’( 不過終於都揾到個原因, 個心叫做放鬆咗. 醫生解釋咗要點做, 即場抽埋血去驗癌症指數, 幾日後去覆診, 安排手術日期. 是次收費1880 同場加演我即日去港安醫院投訴果個門診醫生. 因為我睇過佢3次症, 問過佢2次我係咪婦科病, 佢都話唔係, 又唔安排/建議我去照下, 反而係個針灸中醫叫我去照下…… 令我無啦啦痛多2個月! 如果唔係良性, 佢絕對拖延咗我個黃金時期去醫治個瘤!! 總之我就黑仔, 遇到個唔好的醫生~_~ - 2020/10/20: 覆診, CA125指數正常 (29), 應該不是癌症. 醫生再講一次成個手術係點, 要住幾多日, 即場book 好醫院床位各樣野, 因為疫性關係, 最快都要2/11 先有得做, 即係我仲要痛多一排… 雖然網上好多人都話呢個醫生講野好快, 唔想答人野, 態度又唔好, 但我又完全唔覺喎?! 可能1. 我唔係去照BB, 2. 佢呢年無乜生意 (肺炎關係大陸人落唔到黎生仔), 所以佢對我態度好好, 仲好COMMERCIAL , 話第時生仔揾佢之類的說話… 而家乜野心情都無, 仲同我講生仔… ~_~ 佢話佢割朱古力瘤都有成20幾年經驗, 做微創, 所以有佢幫我做手術我都好放心. 直到做手術前我每晚都要食止痛藥先訓到第二日6-7 點, 跟住痛醒, 整個朝早都會痛, 有時頂唔到又食止痛藥. 其實真係好困擾. 呢2個幾月有時會為咗 “今晚又唔知會唔會痛醒” 而擔心. 從來未有咁期待做手術, 又驚, 但又好想快D到果日.
