箍牙前準備 - 剝牙篇13/8/2020懷住好好好驚的心情去診所, 聽到佢叫我個名入去, 心跳好似停頓左咁.醫生好好, 問我驚唔驚, 我同佢講, 我最怕痛, 佢就抱抱我膊頭, 話 “唔痛架, 我幫你搽D野, 跟住打針, 等一陣就剝好快搞掂啦” 一個有同理心的牙醫絕對令你心理上覺得舒緩不小. 每隻牙打2支麻醉針, 打針當然有點痛, 但醫生好好, 慢慢打, 所以無話好痛 (但當然因為打得慢就痛耐咗少少啦). 打完針, 醫生就去左第二張床睇第二個PATIENT 補充: 入面有三張床, 目測有2位矯齒專科牙醫 + 5-6位姑娘+職員. 其中一位牙醫比較有名氣 (不論是好評還是差評), 而我選擇另一位, 爬文幾乎無人評論過佢… (祝我好運!) 期間有個護士黎幫我4隻大牙塞藍色膠, 用來預備定上箍帶介子留空位. 因為已經麻醉左, 所以佢塞乜落我牙度我都無哂反應 (請注意圖不是我的, 是偷回來的, 我都忘了拍, 但想給大家一個概念係點樣樣的~) 等左起碼3-4個字, 好擔心麻醉藥已經過無效果. 剝右上第一隻, 有少少感覺但未算係痛 (但比起剝智慧齒, 個感覺都幾大下). 到右下, 佢搖第3/4下我已經覺得好痛, 忍住, 再搖多幾下, 甩左. 我同佢講都幾痛下, 佢話, 下面2隻牙佢無打針打到好入, 因為唔想我成條脷都痺哂 (唔明白係乜概念) 同埋話我牙腳比較長, 難剝D 再剝左上, 同右上一樣, 唔算痛 最可怕的畫面來了 – 左下. 佢搖左幾下, 我覺得好痛, 痛到就好似監生剝佢出黎咁, 我頂唔順, 叫停. 佢再打多2支麻醉針, 再等5分鐘又黎過, 基本上都係痛, 唯有忍, 搖6-8下, 終於甩左……. (嗚.. 好痛呀~~~) 原來一次過剝4隻牙後, 個口幾乎係無哂感覺. 我仲好型咁用左半小時去買生日蛋糕. 返到屋企, 屋企人第一時間就話 “你D 血口水喺個口罩度流緊出黎呀…” 一路滴落件衫度… SHIT! 原來成個罩下巴全部都係血口水, 只係我無感覺完全唔知道. 好彩我帶黃色口罩D血水先無咁覺眼, 如果唔係嚇死哂街D人… 所以呢, 各位剝完牙第一時間最好返屋企整理啊~ 呢4個牙LONE有點難止血, 可能我咬棉花咬得唔好, 要到第二日先叫完全止血. 我下午剝牙的, 基本上之後只食左幾啖粥, 好攰, 就訓左… 最唔慣就係塞左入大牙果4粒藍色膠, 大牙有點酸, 咬野要好用力, 但又未至於痛, 總之就係唔舒服 睇正面唔太覺無咗4隻牙, HEHE :) PS: 擦牙時唔小心HIGH 到果4個牙LONE 都會有少少流血, 但問題不大, 約3星期後D血蕉開始慢慢地離開...對麻醉藥有少少敏感的我, 打後成個星期都好似病病地, 有時會擔心自己係咪中左肺炎 ~_~ 正式走上箍牙之路~
