長文長文長文啊~無圖無圖無圖啊~ 最初箍牙考慮D乜?- 唔想剝牙, 因為怕痛, 同埋無啦啦無左4隻牙好似好無謂- 最好用帶透明牙套果隻, 好似方便D, 過程又無咁樣衰- 最好近我 (屯門), 棚牙途中發生乜野事都可以9秒9到診所搞- 希望個牙醫同姑娘會有耐性答我一D 無聊問題 (痛唔痛架? 會唔會唔靚架? 我好怕痛架, 可唔可以就住我…….) 由2019年7月到 2020年7月, 一共CONSULT 過4位牙醫 (我實在係太謹慎了, 哈哈, 箍牙對我黎講係大事, 所以問多幾個好D) 1. 葵芳的專科牙醫 (2019年7月)佢好出名的, 係屋企人介紹, 但係咪矯齒專科就唔知了我去洗牙順便問佢剝智慧牙同箍牙幾錢等等, 佢幫我照左張XRAY.照完張XRAY, 等左佢15分鐘先返來招呼我 (因為佢有2間房2張床, 想像唔到第時喺呢度箍牙會唔會整整下佢又走左去隔離…)因為我一開始就想用隱適美, 所以佢只提及呢個方法佢話唔洗剝牙, 幫我每隻牙磨下就得. 我棚牙好易搞. 然後我問佢, 我而家棚牙對唔到中線, 呢樣野可唔可以矯正到, 佢竟然話, 佢唔覺得對唔到中線~_~ (唔係牙醫都睇得出係對唔到啦…) 跟住佢改口話, 呢D咁少得自己會察覺到…… (係呀, 我就係睇到呀, 所以咪想改善囉…) 補充: 剝智慧牙同箍牙係無關係, 因為箍牙係唔會用到智慧牙D位 到最後報價, 剝4隻智慧牙9800+9200, 箍牙52000. 對我黎講, 好貴. 不過我明白, 專科麻, 係貴架啦. 反而今次洗牙+X RAY 唔算太貴, 1000有找. 立即搭車返屯門去問另一個門診牙醫. 2. 屯門龍門居的門診牙醫 (2019年7月)入到去首先問剝智慧牙幾錢, 下面每隻2500要開刀, 上面每隻1000不用開刀, 剝哂4隻只係7000蚊 (葵芳的剝一邊都唔得……)再問箍牙幾錢同點整. 佢一黎就話 “哦, 想靚D呀” (暗示其實無需要…) 又話我棚牙唔適合用隠適美, 同埋要剝4隻牙, 箍最少2年 (佢好直接話我老, D骨郁得慢…). 價錢方面好吸引, 3萬蚊, 包剝4隻牙. 補充: 呢位牙醫出名惡, 雖然近呢幾年態度好左, 但依然係惡的XD 到最後我話諗下先, 100蚊埋單. 一路拖拖拖, 拖到2020年6月再CONSULT 多2間 3. 屯門市中心的門診牙醫 (2020年6月)呢間D姑娘好無里頭, 我打去BOOK 的時候已經講左話我想箍牙問意見, 佢話OK, 到我去到, 個牙醫話佢只係做洗補剝, 唔做箍牙 (定係佢厭我老唔接我個CASE?). 但最後佢都叫我訓低俾佢睇下, 話我要點箍點箍, 要剝邊隻牙, 講左約5分鐘就叫我走, 無收錢. 實在9唔搭8. 4. 屯門柏麗商場的矯齒牙醫6月頭打去BOOK, 要7月中先有得見, 第一次CONSULT 唔洗錢, 既然唔洗錢就好樂意BOOK 左先. 去到門口以為佢無開, 入面黑媽媽, 但好大 (我大鄉里平時只幫襯普通門診牙醫), 同冷氣好夠 (出面30幾度熱死人). 做完基本登記等左唔夠2-3個字就到我. 牙醫同姑娘態度都好好. 訓低後醫生好細心用把尺去度我棚牙同個口, 一路講野個姑娘就一路寫低, 當然佢地講乜我唔係好明… 睇完就話我棚牙有以下問題: . 對唔到中線 . 下排門牙擠擁 . 上排有D哨牙 . 側面睇有D 突咀 (佢唔講我唔覺) . 左右面有D唔對稱 (因為上排牙有點向右斜上, 所以成個咀都拉左向右上, 呢個係我完全發現唔到的問題) 最後, 佢話用傳統箍最好, 有2個選擇:A: 唔剝牙住, 箍下睇下個效果點 (醫生話多數會上排再哨牙多少少, 下排又會再出D, 即係個口大左, 然後佢好多PATIENTS到最後都會選擇剝牙)B: 剝4隻牙先上箍 (醫生建議剝牙, 因為本身唔夠位, 剝牙後有足夠位俾牙齒去排齊又可以成棚牙收返入去, 就會變靚女 ß 箍牙的唯一目的) 價錢方面傳統銀色鋼箍 + 鋼粒 – 42000傳統銀色鋼箍 + 陶瓷粒 – 44000診所不做洗補剝的, 但箍牙要剝的牙齒可以, 每隻650 X 4 = 2600 以上價錢基本包哂整個過程, 除非食野唔小心整爛個箍超過5次就會有罰款 (幾多錢就唔記得了) 醫生同我講解約20分鐘, 姑娘講解價錢+過程約20分鐘. 最後我的回應都係 “諗下先”. 可能帶住個口罩 (肺炎啊), 所以我睇唔到佢有無黑面 XD 但佢好似預左係呢個答案, 話 “可以呀, 你慢慢考慮下啦” 態度依然好好~瘋狂爬文 (特別鳴謝連登, 可惜我無ACCOUNT) + 內心掙扎咗1星期, 最後決定去第4位牙醫度箍- 雖然大家都係用傳統箍, 但呢間貴成萬幾蚊, 不過牙醫篤中左我死穴 – 我要靚. 龍門居的門診牙醫應該無咁好耐性去令我棚牙做到95分或以上, 同埋更加會覺得我煩成日問呢樣問果樣…- 話哂都係矯齒專科, 質素應該有保證 (掛)- 去柏麗商場只需10分鐘, 去龍門居要30分鐘 (行路)
