我最怕痛, 但又想靚, 箍牙對我黎講太大件事, 要記錄下, 順便分享下 :)A. 未箍牙前篇點解想箍牙?- 下面棚牙前門牙唔夠位生, 勁唔齊.- 上面棚牙有少少向右上科, 前面2隻門牙唔對中線 點解一直唔去箍牙?- 細個時候屋企人唔會理牙齒保健儀容等問題, 覺得你有刷牙就夠- 細個時無錢- 出黎做野時無人講過話我棚牙有問題 (事實上只係外面唔靚, 實際上係無箍牙的需要) 點解差唔多成40歲人先想去箍牙?- 拉遠D去講, 上年有個朋友佢隻智慧牙打橫生, 上面頂住前面隻大牙, 牙腳插入神經線, 普通門診已經唔接佢剝牙, 要去專科, 過萬蚊埋單. 自己諗返起幾年前去洗牙, 牙醫已經同我講左2次, 話我下面2隻智慧牙都打橫生, 要剝, 不過怕痛又無心理準備的我當然無聽佢講野啦~ 但見到朋友咁樣, 就覺得唔可以再拖落去. 所以就的起心肝去剝智慧牙 (剝智慧牙遲D再詳細講). 不過, 怕痛的我 (我真係好好好好怕痛) 由2019年夏天CONSULT 到2020年1月先去剝左1邊智慧牙 (發現自己真係好鍾意拖…), 再喺2020年5月尾剝埋另1邊, 1共4隻, 實在不知道從哪裡來的勇氣…- 因為剝左4隻牙都唔覺得痛, 同埋2019年見第一個牙醫時已經想執下棚牙, 再喺電視/街見到人地有棚靚牙十分羨慕. 既然最大障礙 “痛” 已經克服到, 就下定決心要去箍牙~~~ 箍牙前有乜野掙扎?- 錢. 覺得貴 (3-7萬)- 咁老先去箍好似好唔抵 (但如果我唔去箍, 我覺得我餘生每日對住塊鏡見到自己棚牙, 我都會好後悔點解無去箍牙)- 怕箍牙失敗 (仲樣衰過唔箍)- 屋企人/身邊朋友覺得無需要, 無謂搞著自己身體, 又無端端要剝多4隻牙 點都好, 到最後, 我決定左落火坑.
