居酒屋通常都係飲下清酒食下小食傾下計咁，好少話去食正餐。 但係以我同我男朋友呢對咁中意食嘅情侶收工淨係食小食點會夠，所以從來都冇話諗住夜晚收工去居酒屋食野。 不過近日我男朋友個同事話呢間深宵食堂好得，小食不在話下，連個d主食，即係飯個d都好正，咁我同我男朋友就達成協議，一於就去食個晚飯 ----------- 一入到去唔係好多位，裝修幾精緻，我地就坐左係窗邊嘅高枱到。 ------------ 佢d燒物都有幾多特別野 見到虎蝦諗到冇諗就嗌左兩隻，嗌多客一口牛，芝士年糕，仲有金菇肥牛卷。 ----------- 蔬菜野嘅燒物我男朋友就唔多有興趣，我叫佢點都揀樣我地就揀左翠玉瓜。 ---------- 主食方面我地就叫左鵝肝什菌石窩飯 佢仲有d小食同甜品揀，不過我地就叫住先 ---------- 然後嗌左300ml清酒，我地要左熱嘅，如果唔想飲熱可以嗌凍。 佢個清酒係好飲，入口好純。 ---------- 唔使好耐食物就到啦 係啊又係呢d芝麻配豆腐嘅物體，佢呢個凍得黎食落唔會凍親我d牙，連我男朋友平時唔中意食都話呢個唔錯。 上面個碟係牛利芯，好腍好入味，好彩我食得切，唔係實會比人食埋我個份！ ---------- 食完呢兩碟，先上第三碟 係芝士年糕！ 佢係食落一d都唔膩，外面仲有d脆，所以唔會話食完呢個就食唔到其他。 ---------- 呢到好好，佢係每當您差唔多食完枱面d野先上第二樣，唔使食得咁急。 到我至愛金菇肥牛啦 佢細細粒一啖一粒好貼心，成功迫使男朋友進食金菇！ ---------- 跟著到個一口牛同個蠔 個一口牛同個牛利一樣都係冇得輸，勁juicy勁香！ 個蠔咬落去隻蠔d汁係有爆到出黎，我男朋友就話: 我成口都係蠔水(?) ----------- 個翠玉瓜我就有d失望，因為我覺得佢唔夠牛油味。 ----------- 到個蝦蝦啦！ 超級多蒜，正啊！！！ 而且佢都幾易mit d殼，mit完就啖啖肉 ----------- 主角出場啦！ 好大鍋 佢個鵝肝好香，不過雜菌唔算多同突顯唔到。 但係！！ 佢個汁真係不得了，我同我男朋友夾埋每人食左碗幾飯 ----------- 埋單每人4百幾蚊，但係我地係太興奮地叫左超級多野食，而且呢餐係非常夠飽同好高質，估唔到居酒屋食晚飯都有得諗 如果係3,4個人黎食嗌咁多野食到飽其實都係二百蚊左右，同出面食餐飯差不多，係幾好 ----------- 味道: 5/5 環境: 5/5 地理: 3/5 服務: 4/5 抵食: 4/5 ----------- 深宵食堂(銅鑼灣) 地址： 銅鑼灣耀華街百樂中心6樓 銅鑼灣A出口，步行約2分鐘
