冬陰公就飲得多，但用冬陰公做火鍋湯底，原來味道好正，而且「但馬屋」係一人一鍋，晚市90分鐘任食任飲，我地今晚食 北海道夢之大地豚放題套餐 $249/位，有夢之大地豚肉、澳洲長期穀飼牛、嚴選牛肉、丹麥皇冠豚肉。 我揀冬陰公鍋，先炒香和牛脂肪，加入蝦、魷魚及爆香的泰式香料，最後加入湯。餐廳仲有個泰國蔬菜盤，加入冬陰公必有的泰國茄子，仲可加子彈椒、蕃茄、菇菌類、蔬菜……最正自己加入青檸汁，令個湯更酸更有風味，個湯微辣又香，越食越開胃。 友人揀了意式蕃茄芝士鍋，好重蕃茄味，微酸好開胃。 等待湯底滾起時，可出去自取醬料、飲品。罐裝比較吸引有 可樂plus及 雪碧plus，而加推的「香茅蜜糖茶」就非常夾個泰式冬陰公鍋，味道好清涼解膩，香茅味同蜜糖香都岩岩好。 「夢之大地」豚肉，來自北海道，係良好的環境下飼養的豬，擁有優良肉質，肉質非常嫩，且肉味濃郁，脂肪甘甜，仲好有彈性，配芝麻醬好夾。 澳洲產長期穀飼牛肉，脂肪較少，但都不會硬，肉質柔軟，而且肉味較重，我地仲叫左幾轉。 嚴選牛肉脂肪比例較多，食到牛脂香同甘甜，而且脂肪多，入口都化開，唔使點咬就食到。 冬陰公鍋仲可以任飲泰國象啤，超爽超冰涼，食火鍋食到熱，飲啖啤酒真係好爽好消熱氣感。酒味較輕，男女都飲到。 自取吧夠冰凍，感覺處理及保存食物都很乾淨衛生，很有質素。我取左雞肉、魚肉、芝士腸、芝士豆腐、馬蹄粒魚滑……配料都幾多選擇。 雞肉彈牙，肉質嫩滑，仲夠大件好啖啖肉。魚肉超柔嫩，入口滑溜。馬蹄粒魚滑都好有口感，滑彈魚肉配爽脆馬蹄粒增加口感。 蔬菜吧有四款菜及菇菌類，全部都好乾淨，而且擺放得很好。其中的羽衣甘藍比較貴價同少有，營養價值高味道又好，所以要食多點。 侍應都好勤力添加配料到雪櫃，追加肉類及上菜、收搭木碗及加湯都好迅速，值得一讚。 最後甜品有haagen-dazs的四款口味雪糕，分別有雲尼拿、朱古力、芒果及抹茶。朱古力超多朱古力碎，食左2球都仲想食。芒果超多果肉，好清甜有果香。抹茶係至愛，味道濃重有茶甘，超正。 結帳時，餐廳仲送泰國椰汁軟糖及迷你手機抹布，真係又食又拎，好滿足。
