濃厚花膠雞鍋，我地2人就已經有半隻雞，所以個湯超濃超香雞味，仲有兩大塊手掌咁大既花膠。 花膠用貴價少少的厚身花膠，膠質較重又夠彈，口感豐富，也吸左雞湯精華，食完已經好滿足。雞件偏大，但雞脾位好嫩彈，雞背肉就重味，雞胸都滑唔會乾哂。 食完雞件同花膠就開始火鍋，等緊食物熟時，就可食餐前小食，炸燒賣同魚蛋，味道都唔錯，特別炸燒賣外脆內軟，又有懷舊feel，沾甜酸醬仲正。 時令海鮮拼盤雖無任食，但就新鮮十足，有蝦、蜆、蠔、脆骨腩、墨魚滑。 蠔超肥美脹卜卜，入口creamy又重蠔味，大讚。蝦肉十分爽彈，易去殼夠新鮮，蝦味重。蜆肉飽滿無沙，吸湯汁味又爽口，仲好鮮甜。脆骨腩的魚肉夠爽脆，骨少口感好且不腥。墨魚滑超爽彈，鮮味突出，份量又多。 頂級牛小排，雪花紋最靚，油脂豐富，肉質較有咬口，牛味濃郁。特級安格斯牛肉，牛脂分佈平均，入口脂香味重，肉味也濃。 美國珍寶肥牛，偏肥入口最有油香，但食完較膩。 黑毛豬肉片肉質嫩彈，豬味都重，薄切口感佳，火鍋必食。 墨汁墨魚丸好彈牙，多份墨魚鮮味。流心芝士丸爆芝好勁，濃郁滋味。爆醬魚丸超爽口，內餡爆出豬肉餡同油香。 手包雲吞皮薄餡多，但無蝦的，味道不錯。韮菜水餃皮厚薄剛好，韮菜肉餡比例各半，多汁肉嫩又夠香。魚皮餃好食但無咩特別。 蔬菜及菇類都多選擇，連西洋菜都有，而且新鮮乾淨又靚，雞脾菇吸哂花膠雞湯味，所以好好食。 最後仲有懷舊甜品，就係雜果紅豆涼粉，真係超耐無食，兒時就係食呢類簡單易整價錢實惠的甜品糖水，涼粉超爽滑，配香甜粉綿紅豆及奶香滑溜的花奶，仲有雜果增加口感，係我的完美甜品，從前的美味就在今天。
