< 雲南大理﹑昆明6天遊 > 第二天(續) 趴係枱上，訓左大約一個鐘就醒左啦，時間大約四點半，太陽都開始落山，唔知而家有咩好做呢？其實又唔一定要搵野做既，就咁係道hea下都唔錯啦 由於時候尚早，hostel人唔多好寧靜；而家唔係旺季夜晚都唔多人 行出去門口望望先 原來hostel係食川菜，唔怪得之職員問我食唔食得辣啦！我緊係話食得，都不知幾鐘意食辣野，今次岩晒我心水；今晚六點我就係呢道開餐！ 門口有棵大樹bor，唔知咁多婆婆係道做咩呢？ 門口黎左幾位新住客，而且仲係講廣東話，我又八掛走去同佢地吹吹水，一吹就成個鐘；其中一對廣州auntie uncle好得意，係大理古城胡裡胡亂跟住其他人一齊來到雙廊，但就對雙廊完全唔認識，佢地其實係想去麗江...所以五點幾既時候就幫佢地拎住個喼行出去 大馬路搵車去麗江，可惜時間太遲連啲司機都唔想去...要滯留雙廊一晚... 同auntie uncle搞完一輪，但就咩都幫唔到手，唉...算啦...返到hostel已經六點，準備開飯 今晚有七個人一齊食飯，有好多碟餸多到食唔晒！而且碟碟餸都辣辣地好好食丫，平時就算係屋企或者出街食飯我都只係食一碗飯咋，今餐忍唔住食多左兩碗！呢餐 係全個雲南旅程最豐富既一餐，只係25蚊咋，物超所值^^最特別係我地七個人係黎自七個唔同地方，大家可以坐埋一齊食飯真有緣呢^^ 餸菜色香味俱全，川菜岩晒我 不過其他人食飯食得超快，我都未食完個個已經停晒手啦，搞到幾唔好意思...好彩仲有另一個女仔都係食得咁慢先冇咁樣衰咋 食飽後我地一枱人就趕住出去睇日落，因為我地住呢邊比南詔風情島檔住，所以大家都衡去海地生活個邊 去到時太陽已經落到山邊，最衰食飯食得慢 仲要有舊雲遮住 隱約都可以見到少少金光 點擊圖片放大 +2 太陽就睇唔到啦，晚霞都仲睇到，但相機影唔到紅色晚霞出來 太陽落係個邊邊位，差少少就睇唔到...我見其他人影既相太陽係落正洱海中間，今次我又去唔岩季節啦 影多幾張先 點擊圖片放大 +3 好多人都來到呢道影相，不過太暗啦，上午來影會靚好多；我覺得係雙廊上午影相比下午好，因為雙廊位處洱海東面，上午陽光好靚，下午可能會出現表光問題，影相難度就大左啦 雙廊真係有好多女仔架 Hostel職員都話，佢係hostel做左五十幾日，除左琴日之外其他日子都係女住客比男住客多好多，可想而知好多女仔喜歡到雙廊，男仔反而好少 詩情畫意 一個廣闊洱海；第一日好多雲始終見唔到蒼山全貌，希望明天可以見到啦 月亮都出來，又係時候返去啦 大家都返去hostel，而我就繼續係出面行行；雙廊夜晚好寧靜，除左風聲水聲海浪聲就好少會聽到其他聲音（當然酒吧個邊就好嘈啦！） 觀音娘娘散發光芒，守護大家；望見對岸點點燈光，再加上天上點點星光，又係一幅美麗畫面（冇帶腳架來，影到張相斜晒tim） 農曆十五，月亮又光又圓 但月亮太光反而有壞處，本來我期待睇到滿天星星，而家星光都比月亮光蓋過晒啦...如果唔係撞正月圓之夜，我相信洱海會係一個觀星好地方，成個洱海都冇光害一定可以見到滿天繁星，不過我來錯日子...今晚只可以見到零碎既星光 點擊圖片放大 行到出去相信係夜晚最旺既酒吧，又唔係好多人bor；雙廊晚上比起其他古城靜好多，除左酒吧面前坐左幾枱客人，其他地方唔會有好多人，希望雙廊將來可以繼續保留住呢個寧靜環境啦 寧靜既環境好舒服，唔會比人嘈住又唔會比人影響，可以靜靜地享受眼前美景；影多幾張相就行返去hostel啦，今日雙廊之旅非常開心 點擊圖片放大 大家都係hostel睇緊戲bor，係道同朋友傾下計，十一點幾就訓覺啦，平時好少咁早訓，哈哈^^ 第三天 今日六點就訓醒起身，醒左之後就冇再訓返，係張床上碌來碌去，要等到九點先可以出門口；無聊就係hostel影下相，古老建築係幾靚 點擊圖片放大 +6 掛住好多雲南好出名既火腿 約左朋友九點鐘去食早餐，我就係九點執齊野check out啦，再見啦hostel 沿海邊行返出去，朝早陽光仲未好猛烈，風景依然咁靚 點擊圖片放大 +2 伯伯好型bor 路過碼頭，要繼續行出去先有野食 雙廊呢道食野選擇唔多，隨意入一間餐廳食粥+生煎包 其實我唔係太鐘意食粥，我想叫米線食多啲，不過大家都叫粥咁我都跟大隊一齊食啦 食飽後就行去另一邊（即係半島個邊）睇睇，呢道琴日仲未黎過，襯上午有少少時間就去行下 點擊圖片放大 +3 今日個天好似好多雲bor？ 唔係掛，靘遇都有秘訣 原來呢邊比起我住個邊旺好多，有好多客棧又有好多野賣，相反hostel個道想買野食就只係得一間士多...不過靜有靜既好，唔會一街都係人 點擊圖片放大 山上個道就係琴日去影相既觀景台，都係由上面影落黎靚好多，係下面冇咩好睇 海邊好多建築已經變成客棧/酒店，下次去到咁靚既地方要住海景房先得 點擊圖片放大 +2 好多小攤檔，不過時間尚早旅行團未到，旅客都唔多個 點擊圖片放大 +2 呢邊冇咩好睇，行返出去出面 又見到紫色好靚既勒杜鵑啦 點擊圖片放大 +4 出面啲船仔好似幾好玩，我地一班人都唔執輸，睇下有冇船仔可以坐先 好多地方都可以上船，只要見到有船係道，同船家傾好價錢就可以隨意出發；講價呢個重任就係朋友身上，問過好多個船家，最後講好左一百蚊載六個人環繞南詔風情島一圈，時間大約一個鐘 出發！ 我都貪得意幫手划船，所以中途影相比較少；唔係划船連我都已經忘記左以前自己有玩划艇，仲因為划艇企過係頒獎台之上架，不過已經係十幾年前既事lu... 圍繞南詔風情島 漂蕩係廣闊洱海之上，環境又靚心情又好，坐呢啲小船比起坐大船正好多，要小漁船先襯得起洱海咁靚既自然環境ma 點擊圖片放大 +2 前面就係楊麗萍經營既酒店，冇返三四千蚊都唔洗諗入去住...所以只可遠觀 點擊圖片放大 +2 雖然冇得由陸路入去，但可以由水路接近^^如果划近小小就可以爬上去啦，我當然唔會咁做 咁高要爬上去都唔係易架，哈哈 點擊圖片放大 岸邊一大行都係酒店，好多設計都唔錯 點擊圖片放大 +2 有我幫手划，五十分鐘就完成一圈啦，又係時間泊岸lu 點擊圖片放大 +2 完成呢個小小船程，亦都代表雙廊之旅將會結束；雙廊算係一個我喜歡既地方，風景真係好靚，而且小小既雙廊可以比到人一種舒服﹑hea既感覺，hostel職員都同我講如果我可以住多晚就好啦，可以更加感受到雙廊，佢講得好岩架雙廊我有大部份地方都未去過，如果有多啲時間就可以發現更多雙廊美景啦；唔緊要啦，短短一日已經令我好滿足，大理之旅有個好開始，希望呢份滿足可以延續落去^^ 再見船家！再見雙廊！亦都要同其他朋友講再見！ 大家係呢道分道揚鑣，我要向喜洲出發！有一位朋友聽見我去喜洲後就話想跟我一齊去，多個人多雙筷啫當然冇問題啦，最後就變成兩個人去喜洲 去返琴日落車地方等車，坐返去大理個部巴士，係中途喜洲落車就可以啦，交通好方便，只係等車耐少少，走左一班就要再等多三十五分鐘... 開車後大約一個鐘就會去到喜洲啦 喜洲出名係因為佢係一個白族古鎮，好多遊客都慕名去到喜洲，欣賞古鎮傳統白族建築；而我除左欣賞建築之外，更希望欣賞喜洲自然風景，呢樣就比較少遊客會做啦；網上喜洲自然風景既資料唔係好多，期待喜洲比到我驚喜啦！
