< 北京﹑西安﹑成都﹑雲南23天遊 > 第十三天 四川旅程最後一日，終於要去峨眉山；去峨眉山交通有少少複雜，要先到新南門車站上車，坐車到峨嵋山汽車站，再轉兩程巴士到峨嵋山山腳報國寺汽車站，再要坐巴士上山，見到都覺得複雜，但冇辦法除左包車去之外就係咁複雜；未天光就由hostel坐的士到新南門車站，好彩未天光好容易就上到車 車票只有日期而冇時間，想上車就要早啲去到霸位 順利上到第一班7:20開往峨眉山既車，成都到峨嵋山有百幾公里距離，如無意外大約兩個鐘可以到達 幾經辛苦終於去到峨眉山車站，可惜既係去峨眉山途中遇到大塞車，用左差唔多四個鐘先到呢道落車，唉...計過時間今日應該上唔切金頂啦...咁遠來到都冇得去...如果勉強上去但趕唔到尾班車返成都仲慘，聽朝上唔到飛機就邊道都唔洗去！要怪就怪琴日唔出發啦...... 係車站遇到兩位同我地一樣情況既朋友，大家既然已經來到峨眉山，就決定係咁意都入去峨眉山行行；四個人一齊坐車直接去到萬年寺停車場；有纜車去萬年寺，當然唔會搭啦 今次對峨眉山已經冇咩期望，只係見步行步，邊道有路就向邊道走 點擊圖片放大 呢段路冇咩特別風景可以睇，只係普通花草樹木，如果我唔係知道自己去左峨眉山既話跟本就唔知自己係邊道，附近環境完全冇峨眉山感覺 周圍冷冷清清，店舖冇開門營業，遊人都唔多個 屋頂有雪bor，呢道一千米高都有雪，三千米既金頂一定好多雪 一路行見到一啲村屋，仲有人住係道 點擊圖片放大 +2 來到一個有野食既地方，大家就係道享用午餐 是但叫左幾個餸；係旅遊區食飯都預左價錢貴，不過又要貴又要唔好食咁先衰，附近冇其他野食冇辦法啦，總算可以食得飽 食完休息一陣就繼續出發，去到萬年寺 原來呢道都有野食，不過又係好冷清；冬天好少人來旅遊，就算來到峨眉山大多數人都係去金頂，極少人會來到萬年寺，可能只係得我地幾個糊哩糊塗來到呢道 行上去萬年寺 全條樓梯就只係得一個賣野既婆婆，冇人到都唔知可以點有生意 上到萬年寺，無興趣入去睇，是但影張相就走lu 見路就行，好彩沿路都係下山路，唔會行得好辛苦 有馬騮出沒？ 點擊圖片放大 一路行一路行，其實都幾悶，沿途冇特別風景，除左樹就咩都見唔到；去到白龍洞，唔太清楚呢個係咩地方，我都冇咩心機參觀，到此一遊算 點擊圖片放大 繼續向山下行，有好多樓梯 點擊圖片放大 +2 馬仔就辛苦啦，咩住咁多野上山 去到清音閣；峨眉山係四大佛教名山之一，山上有好多廟宇 我對宗教唔太認識，唔識用宗教角度去參觀寺廟，只係以遊客角度去睇下寺廟既建築，所以好快就參觀完lu 點擊圖片放大 +3 繼續四圍行 路過一大幅石刻 點擊圖片放大 再向前行就進入深山 路過中國特產一線天 點擊圖片放大 山入面都有小攤檔 買左舊不知名東西食 見到有馬騮仔裝飾，就知到去到峨眉山生態猴區 點擊圖片放大 傳說峨眉山既馬騮好惡會搶野食，但來到聲稱係最多馬騮既生態猴區竟然連一隻馬騮都見唔到，都唔知啲馬騮去晒邊...... 唉...無野睇走人 周圍都冇野好睇，回程走人 沿路行去五顯崗停車場方向 條河完全冇水 就去到停車場，終於都有返啲人氣 點擊圖片放大 唐老鴨呢？ 唔見丫？ 呢枝陪左我半日既竹原本係諗住防止馬騮搶野用，不過就用唔上，但總算令我行起來輕鬆好多 深山中既村落 見到牌坊就知道終於去到停車場，峨眉山之旅即將結束 係停車埸等車落山 話咁快就落到山腳 係山腳報國寺門外直接坐車返成都 部車行得好慢，三個鐘後再次回到成都，一個失望既峨眉山之旅正式結束；講真今次都唔知可唔可以話自己去過峨眉山，連我自己去過邊都唔係太清楚，只係見路就行，行到邊就去到邊，好多地方連相機都冇意欲拎出來影相，只係用部DC求其影幾張當去過，唉...都唔知係峨眉山做過咩，所以冇特別野可以分享，只係知道峨眉山真係唔可以一日玩得晒 返到成都已經夜晚，落左車就轉巴士返hostel，攞苦黎辛既旅程終於完結，可以休息一下啦 係出面搞足一日，都係返到hostel最舒服，係道打下桌球傾下計，仲開心過今日去峨眉山 又到開飯時間，今日有得食我最鐘意既蕃茄炒蛋，又平又好食又有營養 朋友叫既意粉賣相都唔錯 食完飯仲可以同貓仔玩，佢地不斷追住條竹超得意 點擊圖片放大 唔知邊個咁得閒畫既呢？ Lazy Bone真係好好住，呢道設施唔一定係最好，但環境﹑氣氛都好舒適，而且職員又好人，所以呢道成為左我最喜愛既青年旅舍啦！ 係出面坐到好夜，都係時候去訓覺lu，明天要一早離開成都前往下一個目的地 住左三晚既四人房雖然細細間，不過又有暖氣又有暖氈（唔敢用XD），晚晚都訓得好舒服 執好行李，明天一訓醒就可以走人 成都短短三日話咁快就過，唔計峨眉山呢日，係成都都算玩得開心，有時候無無聊聊四圍行既旅行都幾好丫；原本只係諗住將成都作為中轉站，對成都冇特別期望，又估唔到成都環境咁靚，仲可以見到可愛既熊貓BB，成都真係冇黎錯！！！
