【Shikoku Wonder Quest - Day3 】2015-05-02 [值得嚟嘅程度 LEVEL 11/12] ☞ 喺四万十川可以感受休閒帶有鄉土氣息嘅感覺，最原本嘅風貌，感覺係好正。 【好靚嘅朝早】 ☞ 一出酒店就順便check-out埋，然後行去車度。天氣非常之靚，完全冇雲。雖然係五月又唔算熱，非常舒服。去到JR高知駅嘅月台全部都係播麵包超人主題曲，聽到真係好開心，人都精神晒。所以自己都忍唔住去咗間賣麵包舖頭食個麵包超人嘅包，餡就係紅豆嚟。 【好靚嘅四萬十川】 ☞ 大約個幾鐘車就去到JR中村駅，一出站就係一個鄉交嘅車站，好空曠，好有鄉下嘅味道，嗰種寧靜嘅環境都令自己慢下腳步落嚟。之後就喺車站附近租單車踩，好似租半日700円。去到間舖個職員好親切，仲俾埋地圖教我點樣去踩邊到，而且仲係可以放低背囊行李，又係免費嘅。我就喺背囊拎咗個腳架出嚟放喺架單車籃裡面，同埋埋職員俾我嘅一張地圖，然後全個背囊都寄存喺間舖。 ☞ 搞點晒就立即出發，身上一身輕晒去踩單車，簡直係爽呀 ❕ 行出去初唔識路，喺啲橫街窄巷兜嚟兜去，因為佢張地圖只係畫咗主要嘅路出嚟，但冇詳細整畫埋啲橫街地方。總之就要先揾到一條紅色嘅橋先，因為一定要踩過呢條橋過河去對面。條橋都唔駛太耐時間就揾到，而且係一條好靚嘅橋嚟，係用鐵做成，有啲框架圍住條橋，好有特色。條橋除咗人行仲有車都可以行，但人行嘅地方好窄，兩個人同時行會好逼，所以踩住單車遇到人嘅時候都要落車就其他人行過，加上都見有人會跑步，踩得就唔係咁爽。 ☞ 一過咗條橋就好正，一條好闊嘅路，一邊係草地，一邊係簡僕嘅民居地方。一路踩住慢慢單車一路感受好微風吹過，非常舒服，好有鄉郊慢步遊嘅感覺。連當地嘅人都喺草地上野餐，札營，望見佢哋都覺得開心。沿途都有啲人似我咁踩單車過去，可能大家目的地都係一樣，就係踩去佐田の沈下橋，係四國一個出名嘅地方嚟。尤其係高知縣，直頭係地標嚟添。 【最有特色嘅佐田の沈下橋】 ☞ 踩咗咁耐，之後睇下地圖，原來我仲有排踩先到條佐渡下沉橋，要加速喇，因為旅遊書都要踩一個鐘先到，但自己差唔多一個鐘都仲未到。之後就全力後咁踩，冇停係咁踩。踩踩吓入咗湖邊嘅地方，雖然唔知有冇踩錯，但路得一條應冇錯掛，最後嚟到佐渡下沉橋嘅地方。 ☞ 佐田下沉橋咁出名係四國唯一一條河川冇任何水庫上嘅建設，有日本最後嘅溪流之稱。而且最大特別係條橋係冇任何嘅圍欄喺度，據稱係河水氾濫時都可以散晒啲水走，因為本身條橋唔高，冇圍欄就可以容易散走啲河水。 ☞ 去到條橋都有好多人去欣賞，都有啲逼。行到條橋望住四面真係好靚，完全係自然嘅景像，冇任何嘅人工建設當中，可以感受最原本嘅風貌，無敵嘅靚景。有啲人會坐喺橋嘅旁邊傾偈吹水同影相，其實感覺係好正。 ☞ 喺條橋都有啲車同電單車行過，但我望住架私家車都覺得有啲危險，因為條橋真係得一個車位闊。當時我都諗冇圍欄會唔會真係有人跌過落去，話口未完就真係有人跌咗個背囊落去。其實我初初睇都見有啲人嘅背囊放咗喺橋邊，確實真係會跌落去無論人唔人為都好。聽到有人哎但唔知講咩，大家隻眼就望住個袋跌咗落河流走。但我自己都愛莫能助，因為一來唔識日文溝唔到叫人幫手，二來自己冇理由自告奮勇落去執返個袋，因為都唔知點落去。不過最後知道有人喺條河執返個袋俾佢。 ☞ 影咗一陣相行陣就返回頭還車，因為仲要去下一個景點，坐四萬十觀光列車。 【轉陣去麵包超人博物館】 ☞ 還車後去JR站問坐下一班四万十觀光列車，但原來一早訂晒位冇得坐，依加先知啲觀光列車係要提前幾日訂先有。咁就大穫喇，車還完又冇得坐觀光列車，企咗喺個站度點算❕ 即刻揾旅遊書高知縣仲有冇咩嘢睇，揾就揾到一個麵包超人博物館。咁即時上網check埋列車同巴士時間趕唔趕到去睇，結果睇咗係夠時間去嘅，咁就嗱嗱聲搭列車先返去高知站再轉列車去JR土佐山田駅。 ☞ 不過中途列車突然慢駛，唔知咩原因，但望住隻錶發覺開始遲晒，如果趕唔到班列車去土佐山田站，就搭唔到巴士去麵包超人博物館。當時心情非常之急，結果雖然列車遲到，但轉另一架列車都有等埋先開。 【好靚嘅麵包超人博物館】 ☞ 到JR土佐山田駅就轉巴士，架巴士山好靚，全架都係麵包超人，連裡面車箱都係麵包超人，包括扶手，地板同座位，實在太得意。 ☞ 坐咗幾個字就到博物館，個館真唔大，但出面嘅展覽就好靚，有個好大兩層高嘅角色喺度添。因為我冇睇麵包超人，但四國咁出名點都要去一去嘅。去到淨返半個鐘嘅參館時間，其實對我嚟講完全冇問題，因為只係純粹望吓，唔係麵包超人嘅愛好者嚟。館內唔算大，擺咗啲畫展，作者嘅手稿同埋大大小小，形形色色唔同嘅公仔擺咗喺度。反而吸引同特別係出面廣場地方，好廣闊，而且有個麵包超人嘅小型遊樂場，但喺度玩嘅一家大細見到佢哋都好開心，加上有好多鯉魚旗掛咗喺度真係好靚，個人嘅心情都好舒服，感受一班小朋友開心咁喺公園玩嘅感覺。 【等一個鐘車 ❕ ❔】 ☞ 個館就五點鐘閂門，我就等五點半班巴士離開，但等咗好耐過晒五點都冇車嚟，之後先發覺原來今日係星期六日嘅時候，巴士呢個班次係唔會開，要等多一個鐘六點半先有❕ 當時諗唔係掛，咁呢一個鐘做咩，周圍咩都冇，連的士都冇，所以有時唔係真係有錢大晒，咁唯有聽住歌等到下一班巴士嚟囉，所以搭日本嘅巴士係絕對要留意班次。 【INFORMATION - 四万十川】 交通: JR中村駅租單車→四万十川 / 佐田の沈下橋 (1小時) 【INFORMATION - 麵包超人博物館 (アンパンマンミュージアム)】 交通: JR土佐山田駅 → JRバス大栃線 [アンパンマンミュージアム前]下車 (約25分) http://www.jr-shikoku.co.jp/…/bus…/rosen_tosa/tosa-ototi.htm 営業時間: 9:30〜17:00 入場料: 大人:700 円 中学生・高校生:500 円 小人（3歳以上小学生）:300 円 http://anpanman-museum.net/ ==================== 外部連結 ==================== 自己係一個普通嘅香港打工仔，趁後生三十歲前，自己無咩負擔嘅時候，訂立一個目標去，兩年時間內 (12/2014 – 12/2016) ，分開17次時間，唔識日文情況下，自己一個人遊歷日本47個都道府縣。 ☞ https://blog.ulifestyle.com.hk/blogger/ao37182/?p=2922849 ☞嚟關西主要地區遊覽，例如大阪，京都等地方，一定要有張周遊券旁身，咁就可以慳唔少錢！ ☞關西地區都推出好多款嘅周遊券，特別係前往京都，大阪，神戶地方，只要因應自己行程需要，再買相關記周遊券，咁可以慳唔少旅費喺交通方面。 有關各種關西地區嘅鐵路周遊券可以CLICK入去睇。 https://blog.ulifestyle.com.hk/blogger/ao37182/?p=2936671
