【Kansai Wonder Quest - Day9】2014-12-13 [值得嚟嘅程度 LEVEL 10/12] 呢日係Kansai Wonder Quest嘅最後一日,去關西一個熱門嘅地方,嵐山。其實呢個地方之前都嚟過一次,嗰次去覺得好正,好有日本嘅風味,好廣闊,所以今次都決定要再嚟多次去感受吓。 ☞ 搭列車去到新大阪站轉京阪鐵路,大約一個鐘車程就到嵐山。沿途搭車都見到一家香港人去嵐山,好開心,佢哋嘅阿爸負責錄影,講大家依加去邊,我覺得幾得意,咁到幾好玩吖。好快就到咗嵐山,呢日好好天非常唔錯。去到第一時間就租單車先,因為想踩住單車遊整個嵐山同嵯峨野。 【後悔租單車踩,好多人@嵐山】 ☞ 到租單車要1000円,都幾貴。拎咗單車踩,但發覺路上面好多人,有時多人到落車都要推住單車行,特別去到到渡月橋嗰度,超多人,所以拎咗架單車變身咗一個負累嚟。嵐山嘅桂川同渡月橋都保持住之前嘅面貌,不過唔同咗嘅係多人咗,係好多。 ☞ 印象之前去係冇咩人,依加直情係有啲逼爆嘅感覺,有啲失去咗嵐山原來嘅風情景貌,感覺濟擁,加上好多旅行團嘅都嚟咗,基本上單車真係踩一踩就落一落地下,或者真係多人得好緊要就落車推。嗰陣真係有啲後悔租咗架單車,根本好難好踩,有時要踩入橫街先可以被到其他人,特別喺渡月橋想影張相真係好難。認真,冇咗我之前兩年前清幽舒服嘅感覺,而變成係盡快離開人群。 ☞ 不過講返嵐山嘅景象我覺得都仲係好靚,尤其望條河流遠望真係幾正,保持古色古香嘅味道。不過真係好多人,所以影每一張好啲嘅相都好困難,所以逗留咗一陣要走,加上我租咗架單車冇理由唔踩遠啲嘅。 ☞ 沿途都好多古店,例如賣和服,油紙傘,木製手工品,不過感覺好似女人街咁,賣好多遊客嘅紀念品,唔似賣當哋嘅特產咁,或者可能唔啱我嘅口味啦。 【好多人 @嵐山竹林】 ☞ 之後就踩去另一個充滿竹林嘅地方,一望落去都好震撼。兩邊嘅竹林真係好大好高,加上周圍有好多分岔路都係同樣種滿呢啲,感覺真係完全四面都俾竹林圍住,有種神秘嘅感覺。 ☞ 不過又係好多人,要影到竹林嘅神緒都冇咩可能。喺呢度嘅人好多,始終竹林裡面條路係好窄,令到啲人逼晒喺條路度,都有啲辛苦。行咗大約一個鐘,又影吓相就離開,中途架單車喺呢度多人到真係冇咩踩過,好嘥添。 【好多人 @龍安寺】 ☞ 經過隔離有個叫龍安寺嘅地方,不過架單車唔可以帶埋去裡面,唯有鎖好架單車放埋一邊先。 ☞ 入到去都幾靚,似一個好大嘅庭園一樣,相比人流就少啲,行得舒服啲。再入去就見到龍安寺,裡面都好靚,水塘嘅水好清,仲見到好多條魚喺裡面游,令到自己身心都有一陣嘅寧靜。不過始終遊人嘅數目太多喇,都係留咗一半個鐘時間咋。連喺池塘旁邊影張相都好多人爭住影,氣氛都破壞晒喇。 ☞ 跟住去咗附近嘅食店食埋嘢就離開,不過冇諗到三點幾嘅時候都仲可以咁多人,連車站搭車都係,最後係要企位先離開到。其實嵐山確實係靚,值得好嘅地方,不過依加大家都去日本,嚟嵐山嘅人越嚟越多,真係唔多唔少令到個景有啲失色。 【夜晚去大阪市道堀頓】 ☞ 夜晚就去返大阪市食元綠壽司,因為我算早六點左右到,所以唔太多人唔駛等位,不過遲啲就見好多人嚟同要等位喇。元綠我喺香港就冇咩點食,但就唔算好好食,至少令我冇咩印象留低。食飽就行道頓屈行著名有百力滋廣告附近嘅運河行吓,睇吓啲精品,都有買其他嘢一路行一路食,例如啲燒蟹腳,燒扇貝,都幾唔錯,因為我九日行程裡面都唔多係去食嘢。 ☞ 最後嚟大阪點都唔可以唔試嘅大阪燒,雖然大阪周圍都有,不過一直冇食係因為自己對大阪燒冇咩興趣,所以最後臨返酒店前買咗個當宵夜食。不過食落我唔覺好好食,始終令人太飽,同埋感覺一啲生菜沙律炒熟,再加一啲甜甜地嘅醬一齊食。 ☞ 最後一晚當返酒店執嘢,而沖完涼之後我係著住聽日要著嘅出街衫同褲去瞓覺,因為第二朝要五點鐘起身,搭頭班嘅南海電鐵去機場,所以一定要一起身就著鞋拎喼走人。第二朝五點鬧鐘一響就著鞋走人,搭頭班車去關西機場,準備上朝早九點鐘班機返香港。 【後記】 ☞ 一個人第一次去九日嘅關西地方,其實都係去京都府為主,令自己認識另一面嘅日本係點。之前同其他人去日本都係主要旅遊區域,同埋購物熱點,反而遠一啲地方就真係冇咩留意。但今次去咗一啲遠少少嘅地方例如天橋立同余吳湖,反而自己更加享受,印象深刻。 ☞ 當中自己感覺好享受一個人深度體驗旅行嘅樂趣,更加發覺有好多旅途嘅驚險情況,自己都深刻體會,加上即時一個人去面對處理,非常難忘,但又幾好玩,我諗搭日本鄉郊巴士呢次真係好難忘記。就係呢啲位置自己嘅獨立能力都有進步,同埋一啲當自己一個去旅行嘅時候所準備嘅嘢好多,亦都幫助自己之後其他再一個人去日本打咗個基礎。 ☞ 好多人都話去咁多日一個人唔悶咩,但我覺得一個人有一個人享受。老實有啲時間係自己覺得有啲悶,因為純粹冇咩目的去行街睇嘢。但當我睇啲景點,特別係遠水路嗰啲,真係發覺時間絕對唔夠洗,好似踩五個鐘嘅余吳湖我覺得真係啱啱夠,所以清楚自己係鐘意睇景多過行街嘅人嚟。 【INFORMATION】 龍安寺 ☞ 參觀費用:850円 ☞ 營業時間 : 3月1日-11月30日: 8:00a.m - 5:00p.m. 12月1日-2月末日: 8:30a.m - 4:30p.m. ☞ 網址 : http://www.ryoanji.jp/smph/index.html 【INFORMATION】 前往嵐山交通 ☞ 京都駅出發 : 京都駅→四条駅→烏丸駅→桂駅→嵐山駅 34分鐘 430円 *可以使用"關西周遊卡" : http://www.surutto.com/tickets/kansai_thru_hantaiji.html ☞ 梅田駅 / JR大阪駅出發 : 梅田駅→桂駅→嵐山駅 56分鐘 400円 *可以使用"關西周遊卡" : http://www.surutto.com/tickets/kansai_thru_hantaiji.html ==================== 外部連結 ==================== 自己係一個普通嘅香港打工仔,趁後生三十歲前,自己無咩負擔嘅時候,訂立一個目標去,兩年時間內 (12/2014 – 12/2016) ,分開17次時間,唔識日文情況下,自己一個人遊歷日本47個都道府縣。 ☞ https://blog.ulifestyle.com.hk/blogger/ao37182/?p=2922849 ☞嚟關西主要地區遊覽,例如大阪,京都等地方,一定要有張周遊券旁身,咁就可以慳唔少錢! ☞關西地區都推出好多款嘅周遊券,特別係前往京都,大阪,神戶地方,只要因應自己行程需要,再買相關記周遊券,咁可以慳唔少旅費喺交通方面。 有關各種關西地區嘅鐵路周遊券可以CLICK入去睇。 ☞ https://blog.ulifestyle.com.hk/blogger/ao37182/?p=2936671