【 Kansai Wonder Quest - Day6】2014-12-10 [值得嚟嘅程度 LEVEL 14/15] 余呉湖我覺得真係激靚，即使去過其他唔同嘅日本地方，都仲係數一數二嘅靚景嚟。亦都係第一次純粹喺網上揾資料去，冇喺任何嘅旅遊書揾到，呢日堅玩得好開心。 ☞ 呢日就好早起身，成五點要起身，即刻搭列車起行，淨係喺車站買咗支牛奶咖啡就搭車走人，冇買其他嘢食，因為今日嘅行程都幾趕。 1. 余呉湖位置 點擊圖片放大 2. 列車車門要㩒掣去先會開 ! 由JR大阪駅搭到新幹線去到JR米原駅轉車，但唔知邊一個月台轉先啱，就問旁邊嘅站務員問。佢就話呢架係去余呉駅，不過，行到架列車前，點解唔開門，但車裡面好多人喎，諗緊究竟點上車。車箱嘅乘客望住我但我又上唔到車，仲諗係唔係對面門先上到車。之後係見到有其他乘客由其他車門上車，但係明明閂咗門喎，喺度諗究竟點入去？ 跟住自己望到門前有兩掣，一個係開同閂嘅掣，咁我就諗應該剛才個乘客應該係咁呢粒掣開門入去。一㩒對門真係開咗，我終於入到去喇 ❕不過當我入咗之後企喺門口嗰個人啤住我，我諗做咩事？原來我入咗嚟一陣都冇㩒車裡面嘅閂門掣，結果啤住我嘅乘客㩒掣閂翻，因為我唔知係可以車箱㩒掣閂門，真係見識少。 沿路窗外景色慢慢由市區變成鄉郊地方，淨係望到啲農地。之後有啲地方開始積雪，好正呀，因為係我第一次見到有積雪。差唔多去余呉駅，啲積雪非常之多，我一落車見到咁多雪好興奮，完全冇諗過有埋積雪呢樣嘢。 3. 駅冇出閘機 除咗積雪呢樣嘢特別之外，出閘嘅時候係冇出閘機，亦都冇人嚟處理車飛或者剪票。一落車就咁出去就可以，感覺太神奇喇。因為平時出閘都係慣咗啲大站用出入閘機過，而冇諗到係就咁離開。當時即時諗日本人真係好信得過自己人，呢啲就係強勁嘅民族意識。 4. 租單車出發去余呉湖 一離開去車站旁邊租單車，但見冇開門，心諗係唔係唔開，定係間嘢唔係近。但見出面唔似會有，因為其他都係民居嚟。跟住我見到車站旁邊有一個類似辦公室嘅嘢，裡面就坐咗一個阿伯，咁我就拎咗預先喺香港印定嘅租單車嘅位置圖問佢邊度可以租單車，原來就係喺佢呢度租單車。 我係一個完全唔識日文嘅人嚟，個阿伯好好人都熱情，佢盡量用英文同我講，雖然係單字，但都俾心機講，自己都有啲唔好意思。租單車係500円全日，好抵呀，一拎咗車就向前踩，出發去余吳湖邊踩單車喇。 初初踩其實都唔知應該去邊個方向踩，離開咗民居地方，出到嚟其實係一個農田嚟，不過全部都積晒雪，好靚呀，而且地方好廣闊，所有農地積晒雪邊得一遍雪白，雖然係踩緊單車，但踩幾步就停吓落車影相，因為靚得太緊要，而且真係咁大個人第一次見雪，實在忍唔住係咁影。 5. 余呉湖太靚，係咁影相 踩踩吓就真係見到個湖喎，之後查過真係余呉湖嚟。咁踩到湖邊啦睇個湖啦，忍唔住走入去一個湖邊嘅公園裡面影相，而且仲不斷踩吓啲雪嚟玩，踩到成隻靴都係雪，但真係覺得好好玩。 望住個湖，白色嘅雪地，加上寧靜嘅環境，遠望有幾個人喺湖邊釣魚，感覺好寫意。逗留咗一陣就再踩架單車，沿住湖邊一直係咁踩，當中除咗有車經過都見唔到有人喺度，係有一兩個人出門揸車先見到。 湖邊馬路嘅另一邊見到有好多快艇細型嘅船隻擺咗喺度，唔知係唔係船廠嚟。之前踩到湖邊旁嘅農田，又不自禁就咗落去農田知間嘅路嚟行，而田嘅中間嘅路好多都舖滿雪，好興奮。見到好雪上面有啲腳印行過，而且都走得幾遠，咁我就跟住啲腳印行始終安全啲，因為啲雪滿到你跟本分唔到邊度係條路，邊度係塊田，一唔小心踩錯就麻煩。 喺呢度望過去個湖真係好靚，少少陰天但加上一大遍白色嘅雪，周邊只有幾隻雀仔嘅叫聲，感覺好似整個時間慢晒落嚟，好似進入咗另一個世界咁。相比幾日前去過嘅地方係兩個世界。不斷踩吓啲雪，不斷嘅影相，先至離開呢度。雖然話繼續踩單車，但又不其然行咗落去湖邊又係咁影相。真係，實在係太靚，本身余吳湖已經係好靚，夠清夠寧靜覺得湖面好平靜，加上積雪嘅映襯，令到影每一張相都影出嚟係絕景嚟。 6. 踩到余呉湖嘅另一邊 當去到某一個位，就見俾啲樹遮晒，淨係得條車路，咁我就喺呢段其間全力踩行佢，一來都入咗個樹林都冇咩嘢影，二來真係想踩多感受湖邊踩單車樂趣，之前一路影相一路踩都唔覺係踩緊單車。不過一離開樹林，去到湖嘅另一邊，又開始見到啲雪景嘅時候，又再次拎起腳架同相機出嚟，加上逐漸天睛，睇嘅風景更加靚添，又回復踩一陣又停一陣影相嘅情況。都係嗰句，因為真係好靚。 點擊圖片放大 +3 7. 俾日本人問香港佔中 之後中途就見到有幾個日本嘅女人從迎面方向嚟咗，仲叫我幫佢哋影相。影完之後其中一個女人，其實佢哋係中年，用英文問我喺邊度嚟。當我搭香港佢哋都即刻愕然，因為佢話呢啲地方係冇咩遊客嚟，仲問我點知有呢個地方玩。都係嘅，我踩咗一圈，都見唔到其他踩單車嘅人。之後個女人仲問Hong Kong has a big issue，跟住我諗咗好耐係咩issue。個女人再補充話依加香港政府佔中，我知佢講咩喇，記得當時仲問我對呢件事有咩睇法，我話冇特別睇法，因為霎時間喺日本諗唔到應該講啲咩。當時我先知佔中原來連日本都知，仲有呢啲咁鄉郊地區嘅人都知 ❕ 8. 車站變超靚嘅雪景 之後就踩返去還車嘅地方，畢竟自己原來踩咗好耐，用咗五個鐘時間先完成。記得到余吳湖係九點幾，但係還車係兩點嘅事嚟。還完車就去去返JR余呉湖等車走，入咗去個站幾本係冇人等車，得我一個，顯得個車站好大。 個站基本上係中間位置整咗個有蓋嘅候候車地方，而車站兩端係露天嚟。首先就望望下一班車幾時嚟，仲有幾十幾分鐘先到，所以行去望吓車站露天嘅地方，因為眼見完全係積晒雪，好鬼靚，將一個平凡嘅車站變到一個超靚嘅雪景，不禁喺車站裡面，set埋腳架係咁影相。 其實自己都好好彩，因為只係等咗陣就有車嚟，因為呢啲站基本上係一個鐘一班，但當時我唔知，以為好似MTR咁班次好密，哈哈。如果要我等一個鐘就真係唔知點算喇。 9. 離開余呉湖，去長浜市食嘢 之後列車嚟到就搭去長浜站睇日落，嗰度有一個全日本最大嘅內陸湖，叫琵琶湖。落車第一件事係食嘢先，真係肚餓呀。喺車站大堂首先就睇有冇旅遊資料先，因為根本自己點行都唔知。去到一個觀光案內所拎啲單張睇睇先，裡面有個姐姐好好人拎咗好多地圖同景點資料俾我，仲送個有長浜城嘅File俾我添，好細心，亦都有問我係邊度嚟，叫我寫落張表度，可能係記錄返有邊類型遊客嚟過啦。 睇完地圖就跟住去一條商店街度行，不過唔係全部都有開檔，而食嘢嘅地方都唔多。 我就求其入咗間類似食壽司嘅舖頭，裡面得一個客喺度食，都正常嘅，去到都三點啦。我見到個餐牌有相睇，就叫咗個鰻魚飯定食。個鰻魚飯都唔平，雖然唔記得幾多錢，而且啲鰻魚係得三大舊，並非連住一大塊上。但食落去好好食，好滑而且保燒香嘅味道，貴得嚟係值嘅。叫嘢食個師傅亦都問我喺邊度嚟，我覺得佢哋啲人好親切，掉轉香港見到外國人都冇幾可會講Where are you from. 10. 去琵琶湖睇日落 食完就立即去琵琶湖邊睇日落，因為五點就會天黑齊，所以都係差唔多時間去。行咗兩三個字就到，琵琶湖邊有個公園仔可以坐係度慢慢睇，望住日落嘅情況都幾舒服，唔知點解當時我會諗住香港嘅荃灣公園。 好快就由日落睇到天黑喇，之後返去剛才條商店街，發覺大部份都閂晒，真係奇怪，同我認識嘅商店街應該係冇咁早收，通常都係八點到先收檔，但我去到七點左右都已經冇晒，咁唯有搭車返去大阪。 前往余呉湖可以使用以下由JR西日本推出嘅【 JR關西鐵路周遊券】，有一日，兩日，三日和四日選擇使用來往余呉湖，以及關西地區 。更可以使用山陽新幹線前往姫路，神戸，岡山，大阪地區。 由大阪前往余呉湖也要2,270円，但持有【JR關西鐵路周遊券】更可以乘搭其他關西地區的JR列車前往兵庫縣，京都府，大阪府，和歌山縣，奈良縣以及滋賀縣，關西國際機場。著名景點包括環球影城，嵯峨嵐山，天橋立，白浜，奈良公園， 神戸市，琵琶湖国定公園等。 亦都可以乘搭包括部份地區巴士路線和部份私營鐵路。 【JR關西鐵路周遊券】官方網頁：https://www.westjr.co.jp/global/tc/ticket/pass/kansai/ 前往余呉湖可以使用以下由JR西日本推出嘅【 JR關西廣域鐵路周遊券】，可以於購買後選擇任何一日開始連續五日使用來往余呉湖，以及全關西地區 。更可以使用山陽新幹線前往姫路，神戸，岡山，大阪地區。 由大阪前往天橋立也要4,110円，但持有【JR關西廣域鐵路周遊券】更可以乘搭其他關西地區的JR特急列車前往兵庫縣，京都府，大阪府，和歌山縣，奈良縣，滋賀縣，岡山縣，鳥取縣以及香川縣及關西國際機場。著名景點包括鳥取砂丘，岡山後楽園，城崎温泉，環球影城，嵯峨嵐山，天橋立，白浜，奈良公園，琵琶湖国定公園等。 亦都可以乘搭包括部份地區巴士路線和部份私營鐵路。 【JR關西廣域鐵路周遊券】官方網頁：https://www.westjr.co.jp/global/tc/ticket/pass/kansai_wide/ 自己係一個普通嘅香港打工仔，趁後生三十歲前，自己無咩負擔嘅時候，訂立一個目標去，兩年時間內 (12/2014 – 12/2016) ，分開17次時間，唔識日文情況下，自己一個人遊歷日本47個都道府縣。 ☞ https://blog.ulifestyle.com.hk/blogger/ao37182/?p=2922849
