【 Kansai Wonder Quest - Day5 】2014-12-9 [值得嚟嘅程度 LEVEL 10/12] 1. 感覺清幽寂靜@鞍馬山 本來今日先係去伏見稻荷,不過尋日起唔到身,所以同今日嘅行程對調。今日去嘅地方要個幾鐘嘅車,所以都要早啲起身,去嘅地方就係京都府鞍馬寺同貴船神社 。 點擊圖片放大 呢個地方係同事介紹我先認識,初初真係未聽過。朝早九點幾出發,去到個站已經覺得好正,四面環山,陽光普照,好寧靜,相比之前去嘅伏見稻荷同宇治更加令人覺得好舒服。 一路行去鞍馬寺,沿途唔見任何人,個玄關真係好靚,加上周邊兩排非常別緻嘅引路燈柱。兩旁亦都種滿咗好多樹,即使啲樹都落晒葉,但冇破壞到樹本身襯托環境嘅功用,反而迎刃出另一種美態,呢種清幽嘅感覺令人覺得好好享受。 2. 好斜嘅電車@山門駅至多宝塔駅 之後要搭電車上另一個山頭,架電車都相當斜,我諗20到30度都有。車箱裡面每行一部都上一級繼續向前,呢種設計都幾特別。落車之後就繼續向前行,沿路都唔係太難行,都係一啲小石級同斜嚟。 點擊圖片放大 再向前行就見到一個平地,可以眺望出面嘅景像,發現有啲類似晨運嘅人做早操。 背後就有一條樓梯,係通去鞍馬神社嘅地方,而樓梯嘅上面都見到一間廟堂嘅東西,當中嘅樹木隱若將廟堂收埋一邊,呢番景像真係好靚。 3. 好廣闊嘅神廟@鞍馬寺頂 上到去神社嘅地方,佔地非常廣闊。當中仲有好幾間神廟,反而個地方有一面係可以望到對面另一座山,一路望一路感覺呢一日好有嶄新嘅感覺。停留咗一陣開始向上繼續行,係開始要上較高嘅石級喇。同埋啲路開始越嚟越窄,行落都有啲辛苦。 當中記得一路行上去個陣,亦都有一個鬼佬喺我前面行,而且睇佢都係自己一個人行,而且行嘅方向同我嘅係一樣,但就大家冇講個嘢,只係佢同我講咗句Konichiwa,而且亦都同佢講句Konichiwa,因為大家行山上其實都攰攰哋,冇乜氣。 點擊圖片放大 +2 4. 勁多樹根@木之根道 上到一個地方地下勁多樹根,原來係其中一個checkpoint,木之根道。周圍地上嘅樹根交織喺一齊,而啲根就係周邊兩旁嘅樹嚟,都幾特別。不過行路嗰陣就要小心啲,都幾容易碰到地上嘅樹根失平衡,不過樹根嘅數量唔算多,而且兩旁嘅位置亦都唔係好陡峭。 喺嗰度逗留咗一陣,突然開始有啲雨粉落嚟,之後開始有啲大,所以都準備落山。一路落山就一落住雨,而且落山嗰陣地下上面都仲有好多剛才嘅樹根,所以都要小心❕自己就冇開遮,因為嗰度啲樹葉都幾密,都可以擋住啲雨水。 5. 貴船神社 大約行咗四,五個字就落返嚟地面,向前行一陣就係貴船神社,當然要上去望一望。雖然都係一啲普通神社,裡面唔算好大。最吸引都係一入嚟上樓梯級入去神社係幾靚。 然後繼續向前睇有啲咩,不過其實前面係冇嘢睇。右邊有一條河流,而左邊有啲冇開門嘅舖頭。不過當時我覺得總係仲有啲嘢行所以繼續向前。不過繼只發現得一個神社嘅入口,但又寫社貴船神社,不過呢個係叫奧宮,比貴船神社仲細。然後再望前面發覺淨得行車山路,完全冇其他野,加上經已係就快五點,天開漸黑,而且條路上得返我一個人喺度,所以決定折返。 點擊圖片放大 +2 6. 天黑起嚟 + 自己一個人行車路 離開就向下行,諗住一路落去就離開到,不過一路行落去其實係行緊一啲車行嘅山路,係冇行人路。一直行咗好內都唔見有任何人經過,同買都係啲車經過。沿路除咗雨聲同河流水聲都冇其他聲,又唔見人而且自己行緊嘅係車路,所以開始有啲懷疑自己係唔係行啱路,但記得地圖係話由貴船神社行返落去就啱,不過冇人加上天真係黑起嚟所以真係有啲擔心。 雖然沿途係有啲街燈,但係呢啲時候其實真係有啲驚。再行多陣終於見到個車站,原來係叡山電鐵嘅貴船口站。見到心情都放鬆晒,起碼會離開到。咁嗰陣個天就快黑齊,好彩見到個車站。 7. 免費溫泉@峰麗湯 喺呢個時候記得仲有個最後checkpoint要去,就係返去鞍馬站,再坐免費嘅shuttle去浸免費嘅溫泉,叫峰麗湯。去到浸真係山上嘅天然溫泉,都係第一次,而且浸嗰陣真係夜晚嚟,天完全黑晒。 一路浸都好舒服,不過自己就覺得好好奇係咁凍喺露天自己都頂得信都OK喎。點解呢度山頭唔見蛇蟲鼠蟻喺度經過,或者應該咁講,行成個鞍馬山都唔覺有,都幾奇怪,掉轉係香港應該勁多昆蟲喺度。 浸完就再坐Shuttle返鞍馬站搭返去出柳町站再返大阪難波。返到去都已經係九點幾,所以求其揾間食咖哩。 8. 以為鐵路一定好夜先收? 呢日都覺得幾好玩,鐘意咁樣行吓啲寧靜嘅郊區地方,真係幾舒服唔錯。不過,依加我覺得自己由離開貴船神社到貴船口站其實真係好好彩,經過之後好多次唔同嘅日本地方先知,因為唔係度度地方行車路係有街燈嘅。 另外,列車唔係去到好夜仲有,尤其啲山區可能係八九點就收,但我冇睇時間表仲就去浸溫泉,仲用香港MTR嘅概念以為鐵路一定好夜先收,諗返喺其實真係好好彩。 【INFORMATION】 鞍馬寺 ☞ 參觀費用 : 300円 ☞ 交通 : 乘坐京阪電車出町柳駅至鞍馬駅下車 (30分鐘) ☞ 纜車 (山門駅至多宝塔駅) : 2分鐘 費用 : 200円 時刻表 : 山門駅 (8:40 -16:30 / 17:00), 多宝塔駅 (8:45 - 16:35 / 17:05) ☞ 網址 : http://www.kuramadera.or.jp/index.html 【INFORMATION】 貴船神社 ☞ 網址 : http://kifunejinja.jp/index.html 【INFORMATION】 前往鞍馬山交通 ☞ 京都駅出發: 京都駅→烏丸御池駅→三条駅→出町柳駅→鞍馬駅 1小時28分鐘 890円 *可以使用"關西周遊卡"*: http://www.surutto.com/tickets/kansai_thru_hantaiji.html ☞ 梅田駅 / JR大阪駅出發: 梅田駅→東梅田駅→天満橋駅→出町柳駅→鞍馬駅 2小時1分鐘 1,070円 可以使用"關西周遊卡" : http://www.surutto.com/tickets/kansai_thru_hantaiji.html ==================== 外部連結 ==================== 自己係一個普通嘅香港打工仔,趁後生三十歲前,自己無咩負擔嘅時候,訂立一個目標去,兩年時間內 (12/2014 – 12/2016) ,分開17次時間,唔識日文情況下,自己一個人遊歷日本47個都道府縣。 ☞ https://blog.ulifestyle.com.hk/blogger/ao37182/?p=2922849 ☞嚟關西主要地區遊覽,例如大阪,京都等地方,一定要有張周遊券旁身,咁就可以慳唔少錢! ☞關西地區都推出好多款嘅周遊券,特別係前往京都,大阪,神戶地方,只要因應自己行程需要,再買相關記周遊券,咁可以慳唔少旅費喺交通方面。 有關各種關西地區嘅鐵路周遊券可以CLICK入去睇。 ☞ https://blog.ulifestyle.com.hk/blogger/ao37182/?p=2936671