【 Kansai Wonder Quest - Day4 】2014-12-8 [值得嚟嘅程度 LEVEL 11/12] 伏見稲荷千鳥居果然氣勢非同凡響,入咗伏見稲荷迴廊,一個個排住嘅鳥居,感覺好得意。上到山頂望落個市中心嘅地方簡直係靚絕。 1. 好大嘅鳥居@伏見稲荷大社 今日本來唔係去伏見稲荷,不過遲起身,改改次序。朝早坐京阪電鐵去到伏見稲荷駅,個車站好靚,完全係神社為本嘅建設,日本嘅車站真係好有心思。 落車沿住路仔一直去,好快就到伏見稲荷大社。門口嘅鳥居超大,同埋後面有個好大嘅大社,行入去啲見到唔同嘅供奉嘅廟堂同買平安符嘅地方。一大遍地方佈滿好多好靚嘅橙色神社建設,而且仲有啲人祈求願望嘅迷你鳥居一個個掛喺度,超得意。 2. 千鳥居神秘迴廊 伏見稲荷最大特色係一排排勁長嘅鳥居,去到見到感覺好興奮,不過係超多人。一開始入去第一個鳥居覺得好特別,好似入咗個隧道一樣。望遠啲基本上望唔到尾,只係見到條稻荷一直轉彎,無盡頭一直向前。 裡面實在係太多人,加上入去鳥居裡面個空間太細,所以要影一張好嘅相係好難,即使等人影完好快另一啲人又嚟影。所以自己真係等好耐冇晒人,即時影一張兩張相。 喺一條橙色嘅隧道裡面不斷揾出路,中途仲有分岔路,真係好似玩迷宮咁,而且行到咁上下,啲鳥居越嚟越細,係要踎底少少身先過到。不過亦都係呢個部份係最靚,因為啲鳥居排得超密,形成一個好神秘嘅迴廊一樣。 點擊圖片放大 3. 好靚嘅遠景@稲荷山 過咗呢一排最靚嘅鳥居,之後都可以繼續行,不過鳥居排法就疏咗,同埋係大個咗好多,所以好多人都止步返轉頭。但啲鳥居繼續一直排冇斷過,既然難得嚟,決定繼續向前行。其實當時自己經已身處一個山頭裡面,周圍都係樹嚟。而且開始要行啲石級,有上有落。當時自己都唔知係去緊邊,見有鳥居就向前行。 去到一個位置見到個小型供奉位置,同埋一個湖,終於都可以唞吓。之後就繼續行,開始行得越嚟越攰,要樓梯上去,啲石級越嚟越高。當去到一個位置突然冇咗啲鳥居,倒後一望,原來係伏見市嘅遠景嚟,好靚,不枉自己行到咁遠咁高。附近仲有一啲凳擺咗喺度,當然即刻坐嚟唞吓,而且對住個景,側面仲有啲紅葉映襯真係好靚。 點擊圖片放大 4. 上到稲荷山頂 周圍望望,見到一個牌有箭嘴同寫住山頂,咁又即刻起程繼續行,因為都上咗山上面,冇理由唔繼續上去。行多陣,路程都唔遠,又見到一個神社,而旁邊就有一個牌寫住“稲荷山山頂”。見到好開心呀,終於上到去山頂,辛苦咗咁耐都值得。 ☞ 落山旁邊見到一個買符嘅地方,見到有平時啲人會寫願望落鳥居型嘅牌到,然後掛喺嚟。咁我就走去話買一個呢啲鳥居型嘅牌,就同個主持人講可唔可以拎走,因為始終係當地人掛喺度,唔係俾遊客拎走。咁佢答話可以,咁我就買咗一個拎走囉,當係伏見稻荷嘅一個紀念品,記得仲係賣1000円。 5. 行落山食嘢 之後休息一陣,開始沿路行落山離開。落到地面,真係仲好多人,嗰陣都已經係三點幾。之前上山都冇食嘢,入咗間舖頭食碗普通嘅烏冬加豆皮壽司,又喺街食燒竹筍,又幾好食喎,又爽爽地又香。 【INFORMATION】 伏見稲荷 ☞ 參觀時間: 自由參觀 ☞ 參觀費用 :免費 ☞ 交通 : 乘坐JR奈良線至稲荷駅下車步行5分鐘。 乘坐京阪本線至伏見稲荷駅下車步行5分鐘。 ☞ 網址 : http://inari.jp/ 【INFORMATION】 前往伏見稲荷交通 ☞ 京都駅出發: JR京都駅→JR稲荷駅 5分鐘 140円 可以使用 "關西地區鐵路周" / "關西廣域鐵路周遊券"* https://www.westjr.co.jp/global/tc/ticket/pass/ 京都駅→丹波橋駅→伏見稲荷駅 26分鐘 610円 可以使用 "關西地區鐵路周" / "關西廣域鐵路周遊券"* https://www.westjr.co.jp/global/tc/ticket/pass/ ☞ 梅田駅 / JR大阪駅出發: JR大阪駅→JR京都駅→JR稲荷駅 49分鐘 840円 可以使用 "關西地區鐵路周" / "關西廣域鐵路周遊券"* https://www.westjr.co.jp/global/tc/ticket/pass/ ==================== 外部連結 ==================== 自己係一個普通嘅香港打工仔,趁後生三十歲前,自己無咩負擔嘅時候,訂立一個目標去,兩年時間內 (12/2014 – 12/2016) ,分開17次時間,唔識日文情況下,自己一個人遊歷日本47個都道府縣。 ☞ https://blog.ulifestyle.com.hk/blogger/ao37182/?p=2922849 ☞嚟關西主要地區遊覽,例如大阪,京都等地方,一定要有張周遊券旁身,咁就可以慳唔少錢! ☞關西地區都推出好多款嘅周遊券,特別係前往京都,大阪,神戶地方,只要因應自己行程需要,再買相關記周遊券,咁可以慳唔少旅費喺交通方面。 有關各種關西地區嘅鐵路周遊券可以CLICK入去睇。 ☞ https://blog.ulifestyle.com.hk/blogger/ao37182/?p=2936671