Carnival Park Mihama 去完沖繩順便介紹埋所有遊客都會去嘅一個地方，就係美國村。顧名思義美國村就係喺沖繩以美國為主題嘅地方。日夜都好有特色架。 相信大家都知道喺沖繩係有美軍基地，所以沖繩入邊其實都一直充斥着部份西方文化，係沖繩入邊有一條美國村就變得絕不出奇，美國村位於沖繩中部同埋機場之間，所以如果準備去恩納或者名護玩嘅朋友，都會經過美國村嘅所在地，而入邊都有各式各樣唔同嘅景點，所以都建議大家抽返半日時間喺美國村走走。 離遠見到美國村，第一時間就會見到摩天輪，雖然摩天輪已經停止左一段時間，不過絕對係美國村入邊嘅一大地標，佢夜晚仲會有唔同嘅燈飾，係打卡熱點。美國村入邊有好多唔同而有特色嘅裝飾俾大家影相，除咗頭先提到嘅摩天輪，喺海邊仲有一個佈滿噴畫嘅海堤，都係去沖繩旅遊嘅人必影嘅地方。 而係美國村入邊亦有好多唔同種類嘅鋪頭，例如專賣美軍衣服或者好多唔同歐美風格嘅服飾，都可以喺美國村搵到。咁當然美國風格嘅衣服未必適合所有人，但村入邊亦都有啱亞洲人身型或者充滿日本風格嘅鋪頭比大家去購物，而美國村入邊有一間好出名嘅迴轉壽司，佢並唔係出名好食，而係出名價錢平，所有壽司都大約100円就有一碟，絕對係經濟之選，咁當然味道亦都唔會差。不過今次我地都試左美國好出名既restaurant - TONY ROMA'S，野食種類唔多，但啲扒的確好味！點擊圖片放大 買完野食完野，美國村入邊當然唔止咁簡單，佢入邊有一間應該係沖繩最大嘅遊戲機中心，好多人都係嗰度夾公仔夾到樂而忘返，而喺日本夾公仔有一個好處，就係可以叫工作人員示範俾你睇同埋教你點樣夾，咁就更加容易夾到隻公仔，就唔怕兩手空空咁離開遊戲機中心啦。先前提到嘅海邊亦都係一個好適合睇日落嘅地方，所以都建議大家喺晏晝嘅時間嚟到美國村可以周圍買嘢，食個壽司再去遊戲機中心消磨一下，然後再欣賞埋沖繩嘅日落，就可以繼續你哋嘅旅程。 地址 沖縄県中頭郡北谷町美浜15-69 （Map Code：33 526 485*22） 電話 098-926-2117 營業時間 11:00～22:00
